ناکے پر نہ رکنے والی گاڑی پر پولیس کی فائرنگ کار سوار نوجوان زخمی

ڈی آئی جی آپریشنز نے ایس ایچ او شیخ وسیم اختر سمیت ناکے کے 4 اہلکار معطل کر دیئے ۔ فوٹو : فائل

---

لاہور میں ناکے پر نہ رکنے والی گاڑی پر پولیس نے فائرنگ کردی جس سے کار سوار نوجوان زخمی ہوگیا۔

شاہدرہ میں ناکے پر نہ رکنے والے 22 سالہ نوجوان کو پولیس اہلکاروں نے گولی مار دی، نوجوان گولی لگنے سے معمولی زخمی ہوا۔

ڈی آئی جی آپریشنز نے ایس ایچ او شیخ وسیم اختر انچارج چوکی سگیاں اور ناکے کے 4 اہلکار معطل کر دیئے اور کارروائی کا آغاز کردیا۔

گزشتہ رات ناکے پر اہلکاروں نے ایک گاڑی کو رکنے کا اشارہ کیا تھا، گاڑی نہ رکنے پر پولیس نے فائرنگ کردی، گولی گاڑی کی ڈگی سے ہوتی ہوئی ایک آدمی کی ٹانگ میں لگی۔