پیکا کیخلاف براڈکاسٹرز ایسوسی ایشن اور صحافی تنظیموں کی درخواست سماعت کیلئے مقرر

اسلام آباد ہائی کورٹ کے چیف جسٹس اطہر من اللہ 4 مارچ (کل) درخواست پر سماعت کریں گے

ویب ڈیسک March 03, 2022

درخواست میں کہا گیا کہ آرڈیننس جاری کرنے کے لیے صدر کے پاس مناسب جواز ہونا ضروری ہے—فائل فوٹو

VIENNA: پیکا ترمیمی آرڈیننس کے خلاف پاکستان براڈکاسٹرز ایسوسی ایشن اور صحافی تنظیموں کی درخواست اسلام آباد ہائیکورٹ میں سماعت کے لیے مقرر ہوگئی۔

اسلام آباد ہائی کورٹ کے چیف جسٹس اطہر من اللہ 4 مارچ (کل) درخواست پر سماعت کریں گے۔

آل پاکستان نیوز پیپرز سوسائٹی، کونسل آف نیوز پیپرز ایڈیٹرز سمیت پی بی اے، ایسوسی ایشن آف الیکٹرانک میڈیا ایڈیٹرز اینڈ نیوزڈائریکٹرز درخواستگزاروں میں شامل ہیں۔

درخواست میں پیکا ترمیمی آرڈیننس کالعدم قرار دینے کی استدعا کی گئی ہے۔ جس میں مؤقف اختیار کیا گیا کہ آرڈیننس سیلف سینسر شپ کو فروغ دینے کا باعث بنے گا۔

درخواست میں کہا گیا کہ آرڈیننس جاری کرنے کے لیے صدر کے پاس مناسب جواز ہونا ضروری ہے۔