پاکستان نے انسانی بنیادوں پر یوکرین میں بھارتی طلبہ کی مدد کی شاہ محمود قریشی

انہوں نے کہا کہ تمام شہریوں کی واپسی کے لیے مسلسل کوشاں ہیں—فائل فوٹو

---

وزیر خارجہ شاہ محمود قریشی نے کہا کہ پاکستان نے انسانی بنیادوں پر یوکرین میں 'پریشان' بھارتی طلبہ کی مدد کی ہے۔

یہ انکشاف انہوں نے سندھ کے ضلع میرپورخاص میں میڈیا سے گفتگو کرتے ہوئے کیا جہاں وزیر خارجہ نے یوکرین کی صورتحال پر بات کی۔ شاہ محمود قریشی اس وقت کئی دیگر پارٹی رہنماؤں کے ساتھ پی ٹی آئی کے 'حقوق سندھ مارچ' کی قیادت کر رہے ہیں۔

انہوں نے کہا کہ آپ نے ویڈیو ضرور دیکھی ہوگی جس میں پریشان بھارتی طلبہ کو پاکستانی سفارتخانے نے انہیں کھانا پیش کیا اور ان کی دیکھ بھال کی۔

Indian embassy officials are missing at the Romanian border. Pakistan Embassy helping Indian students to escape war in the Ukraine! pic.twitter.com/MG0cmf9LYV

— Ashok Swain (@ashoswai) March 2, 2022

 

شاہ محمود قریشی نے کہا کہ وہ طلبعلم تھے اور پریشانی اور دباؤ میں تھے اس لیے ہم نے انسانی بنیادوں پر ان کے لیے جو ممکن تھا وہ کیا۔

میڈیا سے بات کرتے ہوئے شاہ محمود قریشی نے بتایا کہ پولینڈ، رومانیہ سمیت ہنگری نے پاکستان کو یوکرین سے تمام پاکستانی شہریوں کے محفوظ انخلا کا یقین دلایا ہے۔

وزیر خارجہ نے کہا کہ اللہ کا شکر ہے کہ طلبہ کی بڑی تعداد حفاظت کے ساتھ پہنچ گئی ہے اور جو رہ گئے ہیں ان کی وطن واپسی کےلیے مسلسل کوششیں جاری ہیں۔

انہوں نے موجودہ صورتحال کو ایک 'چیلنج' قرار دیا اور کہا کہ پاکستانی ایمبیسی اپنا کردار ادا کرنے کے لیے کوشاں ہے۔