کراچی فائرنگ سے 2 ہلاک گرفتار ملزمان کی نشاندہی پر 2 بم برآمد

سی آئی ڈی کاماڑی پور میں مکان پر چھاپہ، بم بنانے والا سامان ضبط کرلیا گیا، بنگلے پر بال بم حملہ

Staff Reporter February 22, 2014

سی آئی ڈی کاماڑی پور میں مکان پر چھاپہ، بم بنانے والا سامان ضبط کرلیا گیا، بنگلے پر بال بم حملہ۔ فوٹو: پی پی آئی/فائل

کراچی میں فائرنگ سے2 افرادہلاک ہوگئے جبکہ سی آئی ڈی نے گرفتارملزمان کی نشاندہی پرماڑی پورمیں مکان پرچھاپہ مارکر2بلاک بم اوربم بنانے والا دیگرسامان برآمدکرلیا۔

جمشیدکوارٹرمیں نامعلوم ملزمان بنگلے پربال بم پھینک کرفرارہوگئے جس سے خوف وہراس پھیل گیا۔تفصیلات کے مطابق لیاری نوالین مل ایریامیں لیاری گینگ وار بابا لاڈلہ اورعذیربلوچ کے کارندوں کے درمیان فائرنگ کے تبادلے میں 25سالہ نامعلوم شخص ہلاک اور عبدالغفار نامی شخص زخمی ہوگیا،مقتول کی فوری طور پرشناخت نہیں ہوسکی۔چاکیواڑہ ٹینری روڈپرپولیس مقابلے میں ملزمان 4 کریکر ،ایک دستی بم اور2 ٹی ٹی پستول پھینک کر فرار ہوگئے ،کوئی گرفتاری عمل میں نہیں آسکی۔پاک کالونی دھوبی گھاٹ پرمسلح افراد کی فائرنگ سے موٹر سائیکل سوار30 سالہ طاہر مجیدہلاک ہوگیا،مقتول لیاری آٹھ چوک کارہائشی تھا۔اورنگی ٹائون ساڑھے11میں فائرنگ سے26سالہ عابدزخمی ہوگیا۔کورنگی صنعتی ایریامیں فائرنگ سے14سالہ عامرزخمی ہوگیا۔جمشیدکوارٹرزکے علاقے عامل کالونی میں نامعلوم افراد بنگلے پر بال بم پھینک کر فرار ہوگئے، واقعے کے بعد بنگلے پر تعینات سیکیورٹی گارڈ نے فائرنگ کی جس سے ملزمان فرارہوگئے۔

پولیس کے مطابق اسلامیہ کالج کے قریب عامل کالونی میں قائم بنگلہ نمبر86 کے دروازے پر موٹر سائیکل سوار ملزمان نے ٹینس بال بم پھینکاجو زور دار دھماکے سے پھٹ گیا، بنگلہ مرحوم عبدالرحمن قریشی کی ملکیت ہے جوکہ اسلامیہ کالج کے بانیوں میں شمار ہوتے ہیں،اب یہ بنگلہ ان کے بیٹے کی ملکیت ہے اور اکثر مذکورہ بنگلہ ڈراموں کی شوٹنگ کے لیے استعمال کیا جاتا ہے،حملے کے وقت بھی وہاں شوٹنگ جاری تھی۔جمعرات کی شب سی آئی ڈی کے ہاتھوں ماڑی پور سے بارودسے بھری گاڑی سمیت گرفتارکیے جانے والے ملزمان کی نشاندہی پرسی آئی ڈی نے جمعے کوماڑی پور کے ہی علاقے میں ایک بند مکان پر چھاپہ مارا جہاں سے 2 بلاک بم ، آئی ای ڈی ،نٹ بولٹ ، ڈیڈکور وائر اورکیلوں سمیت متعدد کیمیکل برآمدکرلیے گئے جن کامجموعی وزن تقریباً20کلوہے،مکان سے پٹرول سے بھری بوتلیں، جمعرات کو برآمد کی گئی گاڑی کی سیٹ اور متعدد ٹائر بھی ملے ، کارروائی میں کوئی گرفتاری عمل میں نہیں آسکی، گرفتار ملزمان سے مزید تفتیش جاری ہے۔