عابد شیر علی صوبائیت کو ہوا دے رہے ہیں شاہ محمود قریشی

تحریک انصاف کے رہنما شاہ محمود قریشی نے کہا ہے کہ ن لیگ کی حکومت بجلی کے بحران کے حل کا وعدہ کرکے انتخابات میں ووٹ لینے کے بعد اس مسئلے کو حل نہ کرنے کی وجہ سے بوکھلاہٹ کا شکار ہے۔


حکومت کے خلاف کوئی احتجاجی تحریک چلانے کا فیصلہ پارٹی کی سی ای سی کے اجلاس میں کیا جائے گا۔ آن لائن کو انٹرویو میں انھوںنے کہا کہ پانی و بجلی کے وزیر مملکت عابد شیر علی کے متنازع بیانات کی وجہ سے صوبائیت کو ہوا دی جارہی ہے، ن لیگ حکومت نے جس طرح بجلی کے بلوں میں اضافہ کیا ہے اس کی ماضی میں مثال نہیں ملتی یہ کہنا کہ پختونخواہ میں وزرا اور ممبران اسمبلی بجلی چوروں کی پشت پناہی کررہے ہیں انتہائی مضحکہ خیز بیان ہے، بجلی چوروں کے خلاف اگر ایکشن لینا ہے تو ثبوت کے ساتھ کیا جائے، وفاق اور صوبوں کی ہزاروں اہم شخصیات بجلی کی مد میں ڈیفالٹر ہیں صرف پختونخوا کو تنقید کا نشانہ کیوں بنایا جارہا ہے۔