ایلون مسک نے پیوٹن کو ’ایک ہاتھ‘ سے لڑنے کا نیا چیلنج دے دیا

ایلون مسک اس سے پہلے بھی روسی صدر ولادیمیر پیوٹن کو دست بدست لڑائی کا چیلنج دے چکے ہیں۔ (فوٹو: سوشل میڈیا)

---

RAWALPINDI: دنیا کے امیر ترین شخص، کھرب پتی امریکی تاجر اور اسٹارلنک اور ٹیسلا جیسی مشہور کمپنیوں کے مالک ایلون مسک نے روسی صدر ولادیمیر پیوٹن کو ایک ہاتھ سے لڑائی کا نیا چیلنج دے دیا ہے۔

واضح رہے کہ ولادیمیر پیوٹن کو تائی کوانڈو اور جوڈو کا ماہر سمجھا جاتا ہے جس کا عملی مظاہرہ وہ کئی بار دنیا کے سامنے کرچکے ہیں۔

یوکرین پر روسی حملے کے بعد ایلون مسک نے ٹوئٹر پر پیوٹن کو چیلنج دیتے ہوئے لکھا تھا کہ وہ پیوٹن کو دست بدست لڑائی میں ہرا دیں گے۔

اس ٹویٹ پر پیوٹن نے تو کوئی جواب نہیں دیا لیکن سوشل میڈیا پلیٹ فارم ''ٹیلی گرام'' پر چیچن صدر رمضان قدیروف نے اس چیلنج پر تبصرہ کرتے ہوئے ایلون مسک کو طنزیہ انداز میں ''ایلونا'' (زنانہ نام) سے مخاطب کیا اور کہا کہ وہ تو صرف ایک تاجر اور ٹوئٹر صارف ہے جسے لڑائی بھڑائی کے بارے میں کچھ بھی معلوم نہیں۔

رمضان قدیروف نے ٹیلی گرام پر روسی زبان میں اپنی تفصیلی پوسٹ میں لکھا تھا کہ فی الحال ایلون مسک اور پیوٹن میں کوئی جوڑ نہیں؛ اور اگر ان دونوں میں مقابلہ ہوگیا تھا ''ایلونا'' کو پیوٹن سے بہت مار پڑے گی۔

اسی کے ساتھ رمضان قدیروف نے ایلون مسک کو یہ پیشکش بھی کی کہ اگر وہ پیوٹن سے لڑنے میں واقعی سنجیدہ ہیں تو انہیں چاہیے کہ چیچنیا میں قائم مراکز سے جسمانی اور ذہنی تربیت حاصل کریں۔
یہاں سے وہ گھونسے برداشت کرنا سیکھیں گے جبکہ یہ تربیت ان کے اعصاب کو فولادی بنا دے گی۔

اس طرح جب وہ جمہوریہ چیچنیا سے واپس جائیں تو ''ایلونا'' کے بجائے ایک مختلف شخصیت یعنی ''ایلون'' بن چکے ہوں۔

Telegram post by Ramzan Kadyrov, head of Chechen Republic! pic.twitter.com/UyByR9kywq

— Elon Musk (@elonmusk) March 15, 2022

اس طنزیہ پوسٹ کے جواب میں ایلون مسک نے اپنی ٹویٹ میں لکھا:

''آپ کی پیشکش کا شکریہ، لیکن یہ زبردست تربیت مجھے کچھ زیادہ ہی فائدہ پہنچا دے گی۔ اگر وہ (پیوٹن) لڑائی سے خوفزدہ ہیں تو میں ان کے ساتھ اپنے بائیں ہاتھ سے لڑنے کےلیے بھی تیار ہوں، حالانکہ میں 'بائیں ہتھا' (لیفٹ ہینڈڈ) بھی نہیں ہوں۔'' ایلونا

Thank you for the offer, but such excellent training would give me too much of an advantage.

If he is afraid to fight, I will agree to use only my left hand and I am not even left-handed.

Elona

— Elon Musk (@elonmusk) March 15, 2022

پیوٹن نے اب تک اس ٹویٹ کا بھی کوئی جواب نہیں دیا ہے لیکن سوشل میڈیا صارفین کے ہاتھ ایک بار پھر نئی تفریح آگئی اور یہ ٹویٹ بھی دیکھتے ہی دیکھتے وائرل ہوگئی۔