شہنشاہ جذبات اداکار محمد علی کو مداحوں سے بچھڑے 16 برس بیت گئے

اداکار محمدعلی کو شاندار فنی خدمات پر نگار ایوارڈ سمیت حکومت پاکستان کی جانب سے تمغہ حسن کارکردگی اور تمغہ امتیاز سے بھی نوازا گیا فوٹوفائل

---

TOKYO: پاکستان فلم انڈسٹری میں شہنشاہ جذبات کے لقب سے مشہور نامور اداکار محمد علی کو مداحوں سے بچھڑے 16 برس بیت گئے۔

پاکستان فلم انڈسٹری کے باکمال اور صاحبِ طرز اداکار محمد علی 19 اپریل 1931ء کو بھارت کے شہر رام پور میں پیدا ہوئے۔ پائلٹ بننے کا شوق تھا مگر گھریلو معاشی حالات شوبز کی دنیا میں لے آئے، بھرپور جاندارآواز نے انہیں ایک بہترین ریڈیو صداکار کی حیثیت سے منوایا اور فلمی دنیا تک پہنچانے میں بھی ان کی آواز نے ہی اہم کردار ادا کیا۔

محمد علی نے 1962 میں فِلم ''چراغ جلتا رہا'' سے فلمی کیرئر کا آغاز کیا۔ فلم کا افتتاح مادر ملت محترمہ فاطمہ جناح نے اپنے ہاتھوں سے کیا، مگر اصل شہرت 1963 ءمیں ریلیز ہونے والی فلم ''شرارت'' سے ملی۔محمد علی نے اداکارہ زیبا سے شادی کی اور دونوں نے فلم نگری میں عزّت، وقار اور نام و مقام پایا۔

محمد علی اور زیبا کی مشترکہ فلموں کی تعداد 70 ہے جن میں50سے زائد فلموں میں وہ ہیرو، ہیروئن کے طور پر نظر آئے۔ محمد علی نے ''باجی''، ''دال میں کالا'' اور ''رواج'' سمیت مجموعی طور پر 268 فلموں میں کام کیا۔

اداکار محمد علی نے جاندار اداکاری پر 9 نگار ایوارڈ اپنے نام کیے۔ شاندار پرفارمنس اور بے مثال اداکاری پر حکومت پاکستان کی جانب سے انہیں تمغہ حسن کارکردگی اور تمغہ امتیاز سے بھی نوازا گیا۔

اداکار محمد علی 19 مارچ 2006ء کو ہمیشہ کے لیے دنیا چھوڑ گئے۔ پاکستان فلم انڈسٹری کے سنہرے دور کی جب بھی تاریخ لکھی جائے گی تو شہنشاہ جذبات محمد علی کا نام سنہرے حروف میں لکھا جائے گا۔