جائیداد کے تنازع پر سفاک باپ نے بیٹے بہو اور پوتیوں کو جلا کر مار ڈالا

پولیس نے کارروائی کرتے ہوئے ملزم کو گرفتار کرلیا (فوٹو، فائل)

---

بھارت میں درندہ صفت باپ نے جائیداد کے تنازع پر بیٹے، بہو اور دو معصوم پوتیوں کو آگ لگا کر موت کے گھاٹ اتار دیا۔

میڈیا رپورٹس کے مطابق یہ انسانیت سوز واقعہ بھارتی ریاست کیرالا میں پیش آیا جہاں معمر شخص نے جائیداد کے معاملے پر اپنے بیٹے، بہو اور پوتیوں کو جلا کر مار دیا۔ مقامی پولیس نے بتایا کہ سفاک باپ نے پہلے گھر کو باہر سے تالا لگایا اور پھر مکان کے اندر پیٹرول پھینک کر آگ لگا دی، پولیس نے کارروائی کرتے ہوئے ملزم کو گرفتار کرلیا۔



پولیس کا کہنا ہے کہ تفتیش کے دوران ملزم نے اعتراف جرم بھی کرلیا ہے، اس نے باقاعدہ منصوبہ بندی کے تحت اپنے خاندان کی جان لی، باپ نے گھر کی ٹینکی سے پانی بھی ختم کردیا تھا تاکہ کوئی آگ کو بجھا نہ سکے۔

کیرالا پولیس نے کہا کہ شدید آتشزدگی کے سبب پڑوسی بھی مدد نہیں کرپائے، قانون نافذ کرنے والے اداروں کے اہلکار اور ریسکیو عملے نے آگ پر قابو پانے کے بعد لاشوں کو اسپتال منتقل کیا۔

بھارتی پولیس کا یہ بھی کہنا تھا کہ جائے وقوع پر باپ اور بیٹی کی لاش آپس میں لپٹی ملی، ممکنہ طور پر آگ لگنے پر دونوں نے ایک دوسرے کو گلے لگا لیا تھا جس کی وجہ سے باپ بیٹی کے مردہ جسم کو الگ کرنے میں بھی مشکلات پیش آئیں۔