ورلڈ بینک کی جانب سے سقوط کابل کے دوران پی آئی اے کی خدمات کے اعتراف میں تقریب

ورلڈ بینک کی جانب سے جنگی اور دگرگوں صورتحال میں فضائی آپریشن کو قابل ستائش قراردیا گیا

Staff Reporter March 20, 2022

ورلڈ بینک کی جانب سے جنگی اور دگرگوں صورتحال میں فضائی آپریشن کو قابل ستائش قراردیا گیا۔ (فوٹو فائل)

ورلڈ بینک نے سقوط کابل کے نتیجے میں پیدا ہونے والی غیرمعمولی صورتحال کے دوران پی آئی اے کی فضائی خدمات قابل ستائش قراردے دیں۔

ترجمان پی آئی اے کے مطابق ورلڈ بینک کی جانب سے قومی ایئرلائن کی افغانستان میں جنگی صورتحال کے دوران پیدا ہونے والی خدمات کا اعتراف کرتے ہوئے خصوصی تقریب منعقد کی گئی اور ورلڈ بینک کی جانب سے جنگی اور دگرگوں صورتحال میں فضائی آپریشن کو قابل ستائش قراردیا گیا۔

ورلڈ بینک کی جانب سے کہا گیا ہے کہ ایسے حالات میں جب کوئی بھی ایئرلائن پرواز اڑانے کو تیار نہیں تھی، پی آئی اے کی خدمات لائق تحسین ہیں، ورلڈ بینک کی جانب سے پی آئی اے کو شیلڈز بھی دی گئیں۔

ترجمان کے مطابق پی آئی اے نے سقوط کابل کے بعد عالمی اداروں کے 170 سے زائد ارکان کو افغانستان سے اخراج کے لیے خصوصی پروازوں کے ذریعے فضائی سروسز دیں،جن میں غیرملکیوں،مالیاتی اداروں کے 170 سے زائد نمائندوں بشمول آئی ایم ایف کے 100 ارکان شامل تھے۔