یورو 2016 کوالیفائر ڈراز انگلینڈ اور سوئٹزرلینڈ ایک ہی گروپ میں شامل

دفاعی چیمپئن اسپین کو ابتدائی راؤنڈ میں یوکرین اور سلواکیہ کا چیلنج درپیش رہے گا

Sports Desk February 24, 2014

دفاعی چیمپئن اسپین کو ابتدائی راؤنڈ میں یوکرین اور سلواکیہ کا چیلنج درپیش رہے گا۔ فوٹو: فائل

یورو 2016 کوالیفائنگ ڈراز کا اعلان کردیا گیا،انگلینڈ اور سوئٹزرلینڈ کوایک ہی گروپ میں جگہ ملی ہے۔

جرمن ٹیم لگاتار 12ویں مرتبہ یورو ایونٹ میں شامل ہونے کیلیے اپنی مہم میں پولینڈ، آئرلینڈ، اسکاٹ لینڈ، جورجیا اور جبرالٹر کا سامنا کرے گی۔گروپ ' اے'میں نیدرلینڈز، جمہوریہ چیک، ترکی ، لٹویا، آئس لینڈ اور قازقستان کو شامل کیاگیا ہے، گروپ 'بی' بوسنیا ہرزیگوینیا، بیلجیئم، اسرائیل، ویلز، قبرص اور آندورا سے مکمل کیاگیا ہے، دفاعی چیمپئن اسپین، یوکرین، سلواکیہ، بیلاروس، مقدونیہ اور لگسمبرگ گروپ 'سی' میں موجود ہیں، گروپ 'ڈی' میں جرمنی ،آئرلینڈ، پولینڈ، اسکاٹ لینڈ، جورجیا اور جبرالٹرکورکھاگیا ہے،جرمن ٹیم یورو فائنلز میں لگاتار 12ویں مرتبہ رسائی کیلیے میدان سنبھالے گی، گروپ 'ای' میں انگلینڈ، سوئٹزرلینڈ، سلووینیا، اسٹونیا، لتھووینیا اور سان مارینو کوابتدائی مقابلوں میں سامنا کرناپڑیگا، گروپ ' ایف ' میں یونان، ہنگری، رومانیہ، فن لینڈ، شمالی آئرلینڈ اور فورے آئی لینڈ شامل ہیں، گروپ ' جی' میں روس ، سوئیڈن، آسٹریا، مونٹی نیگرو، مالڈووا، اور لینکنسٹن موجود ہیں، گروپ ' ایچ ' اٹلی، کروشیا، ناروے، بلغاریہ، آذربائیجان اور مالٹا سے مکمل ہوا ہے۔

گروپ ' آئی ' میں پرتگال، ڈنمارک، سربیا، آرمینیا اور البانیہ کو شامل کیاگیا ہے، فائنلز کا میزبان فرانس بطور میزبان کوالیفائی قرار دیا جاچکا ہے لیکن وہ گروپ میچز میں حصہ لے گا لیکن اس کے نتائج کو شمار نہیں کیا جائیگا اور ان میچز کی حیثیت دوستانہ مقابلوں کی ہوگی، کوالیفائنگ مرحلہ رواں برسستمبرسے شروع ہوکر نومبر2015 تک جاری رہے گا، فائنلز کی 23 نشستوں کیلیے53 ممالک برسرپیکار رہیں گے، ماضی کے برعکس 2016 کے فرانس ایونٹ میں 24 ٹیمیں حصہ لیں گی، واضح رہے کہ کسی بھی ایک ملک میں یورو کے مکمل انعقاد کا یہ آخری موقع ہوگا اس کے بعد 2020 سے ایونٹ کو کسی ایک ملک کی بجائے یورپ کے مختلف ممالک میںمنعقد کرانے کا منصوبہ طے پاچکا ہے۔