حکومت گرتی ہوئی دیوار ہے ایک دھکا دینے کی ضرورت ہے فضل الرحمان
ملک اس وقت تباہی کے دہانے پر ہے، مہنگائی عام آدمی کی زندگی تباہ کرچکی ہے، سربراہ جے یو آئی
PESHAWAR:
جمعیت علمائے اسلام (ف) کے سربراہ مولانا فضل الرحمن نے کہا ہے کہ حکومت کے دن تھوڑے رہ گے ہیں، قوم جلد یوم نجات منائے گی، ایک گرتی ہوئی دیوار ہے ایک دھکا دینے کی ضرورت ہے اور 28 مارچ کو متحدہ اپوزیشن کا جلسہ ہوگا۔
موٹر وے پر ہکلہ کے مقام پر میڈیا سے گفتگو کرتے ہوئے مولانا فضل الرحمن کا کہنا تھا کہ حکومت ایک ٹمٹماتا چراغ ہے اور مانند چراغ سحری ہے ایک پھونک مارنے کی ضرورت ہے۔
مولانا فضل الرحمن نے کہا کہ حکومت ختم ہو جائے گی اس وقت پورا ملک اسلام آباد کی جانب رواں ہے اور سب کی ایک ہی آواز ہے 'حکومت جائے اور آئین کے تحت نئی اور شفاف سیاست کاا آغاز ہو'۔
جے یو آئی کے سربراہ نے کہا کہ ملک اس وقت تباہی کے دہانے پر ہے، مہنگائی عام آدمی کی زندگی تباہ کرچکی ہے جبکہ ملک معاشی اور اخلاقی لحاظ سے ڈوب رہا ہے اور معیشت تباہ ہوچکی ہے۔
مولانا فضل الرحمن کا کہنا تھاکہ اگر ملک کو بچانا ہے تو قوم کے لیے کچھ کرنا ہے جبکہ موجودہ حکومت کے دن تھوڑے رہ گے ہیں، جلد قوم یوم نجات منائے گی اور 27 مارچ کو پورا ملک یہاں پہنچ رہا ہے لوگ اسلام آباد کی جانب آمد رہے ہیں۔
خیال رہے کہ مولانا فضل الرحمان کی زیر قیادت مارچ کا قافلہ کشمیر ہائی وے سے اسلام آباد کی حدود میں داخل ہوگیا ہے، پی ڈی ایم کے سربراہ ہکلہ ٹول پلازا سے قافلے کے ہمراہ آئے اور ان کے ہمراہ بڑی تعداد میں گاڑیاں شامل ہیں۔