جے یو آئی والے اسلام آباد کی سڑکیں بند کرنے سے گریز کریں فواد چوہدری کی وارننگ

اسلام آباد میں کسی سیاسی جماعت کو تھیٹر لگانے کی اجازت نہیں ہوگی، وزیر اطلاعات

ویب ڈیسک March 26, 2022

فواد چوہدری (فوٹو : فائل)

QUETTA: وفاقی وزیر اطلاعات و نشریات نے کہا ہے کہ اسلام آباد میں کسی سیاسی جماعت کو تھیٹر لگانے کی اجازت نہیں ہوگی، جے یو آئی والے سڑکیں بند کرنے سے گریز کریں۔

ایکسپریس نیوز کے مطابق فواد چوہدری نے عدالتی فیصلے کے تناظر میں ایک بیان جاری کیا جس میں اُن کا کہنا تھا کہ ‏اسلام آباد ہائی کورٹ نے وزارت داخلہ کی درخواست پر انتظامیہ کو حکم دیا ہے کہ ہر صورت سڑکوں کو کھلا رکھا جائے اور معمول زندگی کو متاثر نہ کیا جائے۔

انہوں نے کہا کہ اسلام آباد میں دھرنے، مظاہرے، جلسے، جلوس یا ریلی کے نام پر کسی سیاسی جماعت کو تھیٹر لگانے کی اجازت نہیں ہوگی، اگر عدالتی حکم کی خلاف ورزی کی گئی تو قانون حرکت میں آئے گا۔

انہوں نے بالخصوص جمیعت علما اسلام (ف) کو مخاطب کرتے ہوئے کہا کہ 'جے یو آئی کے ارکان خصوصی نوٹ کرلیں اور سڑکیں بند کرنے سے احتیاط کریں'۔

واضح رہے کہ 27 مارچ کو حکمراں جماعت بھی اسلام آباد میں اپنا تاریخی جلسہ کرنے جارہی ہے، اس حوالے سے دعویٰ کیا جارہا ہے کہ اس جلسے میں 10 لاکھ افراد شرکت کریں گے جبکہ جے یو آئی اور مسلم لیگ ن کے قافلے بھی اسلام آباد میں مظاہروں اور جلسوں کے لیے شہر اقتدار پہنچ گئے ہیں۔