بلوچستان حکومت کا اے پی سی مارچ کے آخری ہفتے میں بلانے کا فیصلہ

صوبائی حکومت نے اس سلسلے میں سیاسی جماعتوں اور قبائلی عمائدین سے مشاورت کاآغاز کر دیا ہے۔

تنویر محمود راجہ February 25, 2014

صوبائی حکومت نے اس سلسلے میں سیاسی جماعتوں اور قبائلی عمائدین سے مشاورت کاآغاز کر دیا ہے۔. فوٹو: فائل

بلوچستان حکومت نے صوبے میں امن و امان اور ناراض بلوچ رہنماؤں سے مذاکرات کے حوالے سے کل جماعتی کانفرنس مارچ کے آخری ہفتے میں منعقدکرنیکا فیصلہ کیا ہے ۔

صوبائی حکومت نے اس سلسلے میں سیاسی جماعتوں اور قبائلی عمائدین سے مشاورت کاآغاز کر دیا ہے۔ ذرائع کے مطابق کل جماعتی کانفرنس میں صوبے کی تمام سیاسی جماعتوں سمیت وکلاء، سول سوسائٹی اور دانشوروں کو بھی خصوصی طور پر مدعو کیاجائیگاجبکہ وزیراعظم نواز شریف کانفرنس کی صدارت کرینگے۔

کانفرنس میں ناراض بلوچ رہنماؤں سے مذاکرات اور صوبے میں امن و امان کی مجموعی صورتحال کے حوالے سے سیاسی قیادت کواعتماد میں لیاجائیگااورآواران میں زلزلہ متاثرین کی آبادکاری کیلئے کیے گئے حکومتی اقدامات کے بارے میں بھی آگاہ کیا جائیگا۔کانفرنس کے انتظامات کو حتمی شکل دی جا رہی ہے اور صوبائی حکومت نے اس سلسلے میں سیاسی قیادت اور قبائلی عمائدین سے صلاح مشورہ شروع کر دیاہے ۔ واضح رہے کہ صوبائی حکومت نے برسراقتدار آنے کے بعد ناراض بلوچوں کومذاکرات کی دعوت دیتے ہوئے کل جمارتی کانفرنس کااعلان کیا تھا تاہم آواران میں تباہ کن زلزلے کے باعث کانفرنس ملتوی کردی گئی تھی۔