بوہری بازار مارکیٹ یونین کے نام پر غیرقانونی پارکنگ فیس کی وصولی

صدر میں بوہری بازار کے قریب غیر قانونی موٹر سائیکل پارکنگ فیس وصول کی جارہی ہے۔ فوٹو: ایکسپریس

---

SAN FRANCISCO: صدر بوہری بازار میں پتھارا مافیا نے پولیس کی سرپرستی میں غیرقانونی طور پر پارکنگ فیس کی وصولی شروع کردی ہے جس سے گاہکوں کو شدید مشکلات کا سامنا ہے۔

شہر کے مختلف بازاروں اور مقامات پر پارکنگ پہلے ہی شہریوں کے لیے دردسر بنی ہوئی ہے جہاں پارکنگ فیس کی ادائیگی کے باوجود ٹریفک پولیس کا عملہ پارکنگ سے گاڑیاں غائب کرکے جرمانے اور لفٹنگ کے نام پر شہریوں کی جیبیں خالی کررہا ہے لیکن اب صدر کی پتھارا مافیا نے بھی بہتی گنگا میں ہاتھ دھونے شروع کردیے ہیں، صدر کے مختلف بازاروں میں مارکیٹ یونین صدر کے نام سے پارکنگ فیس وصول کی جارہی ہے اور پرچی پر کسی اتھارٹی کا کوئی نشان نہیں بلکہ موٹرسائیکل اینڈ کار سیفٹی کی عبارت چھپی ہوئی ہے۔



بوہری بازار کے دکانداروں کے مطابق پتھارا مافیا نے دکانوں کے سامنے کی جگہوں اور فٹ پاتھوں پر پہلے ہی قبضہ کرکے پتھارے لگائے ہوئے ہیں، دوسری جانب پتھاروں سے بچنے والی جگہوں پر غیرقانونی پارکنگ شروع کردی گئی، دکانداروں کے اعتراض پر مافیا کے کارندے اعتراض کرنے والے دکانداروں کو بھی ہراساں کرتے ہیں، اس مسئلے کی شکایت پولیس کو بھی کی گئی لیکن پولیس مبینہ طور پر پتھارا مافیا کی سرپرستی کررہی ہے اور غیرقانونی پارکنگ کے خلاف کوئی کارروائی نہیں کی جارہی۔