دبئی میں پولیس نے ایک بھکاری کو حراست میں لے لیا جس کے قبضے سے 10 ہزار 890 ڈالر کی رقم برآمد ہوئی۔

عرب میڈیا کے مطابق رمضان کی آمد کے ساتھ ہی بھکاریوں کا ٹولہ دبئی میں سرگرم ہوجاتا ہے اور عوامی مقامات پر عوام کو تنگ کرتا ہے۔

انسداد بھکاری مہم کے دوران پولیس نے ایسے ہی ایک بہروپیے کو حراست میں لیا جو شہریوں کو دھوکا دے کر ہمدردی سمیٹتا اور بھیک لیتا تھا۔

بھکاری کے قبضے سے ڈالرز، درہم اور دیگر کرنسیاں برآمد ہوئیں جن کی مجموعی مالیت 10 ہزار 890 ڈالر بنتی ہے۔ بھکاری غیر ملکی شہری ہے جسے ڈی پورٹ کردیا جائے گا۔

پولیس نے بھکاری اور اس سے برآمد ہونے والی رقم کی تصویر شائع کی ہے تاہم اس کی شناخت ظاہر نہیں کی گئی۔