سعودی عرب شامی باغیوں کو اسلحہ فراہم کرنے سے باز رہے روس کا انتباہ

روس نے سعودی عرب کو خبر دار کیا ہے کہ وہ شامی باغیوں کو اسلحہ فراہم کرنے سے باز رہے کیونکہ اس سے نہ صرف مشرق وسطی بلکہ دیگر ممالک کو بھی خطرہ لاحق ہو جائے گا۔

غیر ملکی خبر رساں ایجنسی کے مطابق روس کی وزارت خارجہ کی جانب سے جاری ایک بیان میں کہا گیا ہے کہ روس کو سعودی عرب کی جانب سے شامی باغیوں کے لئے پاکستان سے راکٹ لانچر، میزائل شکن ٹینک اور زمین سے فضا میں مار کرنے والے میزائل خریدنے کے حوالے سے میڈیا پر چلنے والی خبروں پر بھی شدید تشویش ہے۔

روسی وزارت خارجہ کا کہنا تھا کہ اگر یہ اسلحہ شامی باغیوں کے ہاتھ میں آ گیا تو اس بات کا امکان بہت زیادہ ہے کہ اس اسلحہ و بارود کو مشرق وسطی کے علاوہ دیگر ممالک میں بھی استعمال کیا جائے۔ دوسری جانب پاکستانی دفتر خارجہ نے سعودی عرب کی جانب سے شامی باغیوں کے لئے اسلحہ کی خریداری کے حوالے سے تمام خبروں کو بے بنیاد قرار دیا ہے۔