دنیا کو امن کا گہوارہ بنانے کیلیے مذہبی ہم آہنگی ناگزیر ایکسپریس فورم

ماضی میں بین المذاہب ہم آہنگی کواہم نہیں سمجھا گیا، محمدیوسف، تمام کے ساتھ محبت اوررواداری سے پیش آنا ہوگا،میاں شاہد

اجمل ستار ملک April 16, 2022

’’ایکسپریس فورم‘‘ میں محمد یوسف، مفتی عاشق، علامہ ماجد، گل نسرین اور میاں شاہد شریک ہیں ۔ فوٹو : ایکسپریس

ISLAMABAD: بین المذاہب ہم آہنگی آپشن نہیں بلکہ ہماری بقا کیلیے ضروری ہے۔

دین اسلام امن کا سب سے بڑا داعی ہے، دنیا کو امن کا گہوارہ بنانے کیلیے مذہبی ہم آہنگی ناگزیر ہے، ہمیں تمام مذہبی اکثریت و اقلیتوں کے ساتھ محبت اور رواداری سے پیش آنا اور امتیازی سلوک کا خاتمہ کرنا ہوگا۔

پنجاب میں 2019ء میں باقاعدہ ترمیم کے ذریعے بین المذاہب ہم آہنگی کو قانون کا حصہ بنایا گیا جس کے تحت یونین کونسل، اضلاع اور صوبائی سطح پر بین المذاہب ہم آہنگی کمیٹیاں بنائی جا رہی ہیں، ملتان میں کمیٹیاں بنائی گئی ہیں جن کے اچھے نتائج برآمد ہورہے ہیں۔

انسانی حقوق کو گریجوایشن لیول پر تعلیمی نصاب کا حصہ بنا دیا گیا ہے، سکولوں میں بھی خصوصی اقدامات کیے جارہے ہیں۔ ماں کی گود بچے کی پہلی درسگاہ ہوتی ہے، خواتین امن کے فروغ میں اہم کردار ادا کر سکتی ہیں۔ان خیالات کاا ظہار حکومت، علما اور سول سوسائٹی کے نمائندوں نے ''بین المذاہب ہم آہنگی'' کے حوالے سے منعقدہ ''ایکسپریس فورم'' میں کیا۔ فورم کی معاونت کے فرائض احسن کامرے نے سرانجام دیے۔

ڈپٹی ڈائریکٹر انسانی حقوق و اقلیتی امور پنجاب محمد یوسف نے کہا کہ بین المذاہب ہم آہنگی کوئی آپشن نہیں ہے بلکہ اسی میں ہی ہماری بقاء ہے، ماضی میں اسے کبھی اہم نہیں سمجھا گیا، 2019ء میں باقاعدہ ترمیم کے ذریعے بین المذاہب ہم آہنگی کو قانون کا حصہ بنا دیا گیا۔

ممبر متحدہ علماء بورڈ مفتی سید عاشق حسین نے کہا کہ دین اسلام امن اور بین المذاہب ہم آہنگی کا سب سے بڑا داعی ہے،دنیا کو امن کا گہوارہ بنانے کے لئے مذہبی ہم آہنگی ناگزیر ہے، بین المذاہب ہم آہنگی سے ہم ایک خوشحال اور پر امن معاشرہ قائم کر سکتے ہیں۔ برداشت اور رواداری کو فروغ دے کر ہم شدت پسندی کو کم کر سکتے ہیں۔

محراب اور سکول امن اور رواداری کیلئے اہم ہیں ۔ ضلعی رکن بین المذاہب ہم آہنگی کونسل ملتان علامہ عبدالماجد وٹو نے کہا کہ بین المذاہب ہم آہنگی دنیا کے تمام مذاہب ،عقائد اور ان کے پیروکاروں کے درمیان ہم آہنگی ، قبولیت اور رواداری کا پیغام پھیلانا ہے، تعلیمی ادارے بچوں کی مائنڈ میکنگ کا کام کرتے ہیں رکن بین المذاہب ہم آہنگی کونسل ملتان گل نسرین نے کہا کہ ایک دوسرے کے عقائد کو خوش دلی سے قبول کر کے اور ایک دوسرے کے مذہبی عقائد کو مساوی احترام دے کر بین المذاہب ہم آہنگی کو فروغ دیا جا سکتا ہے۔

سوشل میڈیا بین المذاہب ہم آہنگی کے لئے بھر پور کردار ادا کر سکتا ہے۔ خواتین بین المذاہب ہم آہنگی پربھی اپنا بھرپور کردار ادا کر رہی ہیں اور مزید کریں گی جس سے بین المذاہب ہم آہنگی پیدا ہو گی ۔ نمائندہ سول سوسائٹی میاں شاہد ندیم نے کہا کہ پر امن معاشرے کیلئے ہمیں تمام مذہبی اکثریت و اقلیتوں کے ساتھ محبت اور رواداری سے پیش آنا اور امتیاز کا خاتمہ کرنا ہوگا۔