ثنا خان نے شوہر کے ہمراہ عمرے کی سعادت حاصل کرلی

جو مسلمان اب تک یہاں نہیں آسکے دعا ہے اللہ ان سب کو بھی عمرے کی سعادت نصیب کرے، سابق اداکارہ

ویب ڈیسک April 19, 2022

سابق اداکارہ نے عمرے کی تصویر سوشل میڈیا پر شیئر کردی (فوٹو، فائل)

ISLAMABAD: دینِ اسلام کے لیے اپنی زندگی وقف کرنے کی خاطر بالی ووڈ کو خیر باد کہنے والی سابق اداکارہ ثنا خان نے شوہر مفتی انس سید کے ہمراہ عمرے کی سعادت حاصل کرلی ہے۔

میڈیا رپورٹ کے مطابق ثنا خان نے سماجی رابطے کی فوٹو اور ویڈیو شیئرنگ ایپ انسٹاگرام پر شوہر کے ساتھ تصویر شیئر کی جس میں دونوں مسجد الحرام میں خانہ کعبہ کے سامنے کھڑے دیکھے جاسکتے ہیں۔

سابق اداکارہ نے کیپشن میں لکھا ''الحمداللہ، اللہ کی مدد سے ہم نے عمرے کی ادائیگی مکمل کرلی ہے، اللہ ہم سب کے عمرے کی ادائیگی اور عبادات کو قبول فرمائے، جو لوگ اب تک یہاں نہیں آسکے ان کے لیے اللہ دروازے کھولے۔

خیال رہے کہ عمرے کے لیے روانہ ہونے سے قبل ثنا خان نے سوشل میڈیا پر لکھا تھا کہ وہ دنیا کی سب سے بہترین جگہ جارہی ہیں۔ دوسری جانب بھارتی ماڈل گوہر خان نے بھی اپنے شوہر زید دربار کے ساتھ عمرے کی سعادت حاصل کی۔