پنجگور میں نامعلوم افراد نے میاں بیوی کو کلہاڑیوں کے وار سے قتل کردیا
پولیس نے جائے وقوعہ سے شواہد اکٹھےکر کے تحقیقات کا آغاز کردیا
کراچی:
بلوچستان کے علاقے پنجگور میں نامعلوم افراد نے میاں بیوی کو کلہاڑیوں کے وار کر کے قتل کردیا۔
ایکسپریس نیوز کو لیویز ذرائع سے ملنے والی اطلاع کے مطابق پنجگور کے علاقے گوارگو میں نامعلوم افراد نے میاں بیوی کو مبینہ طور پر گھر میں داخل ہو کر تشدد کے بعد قتل کیا۔
ذرائع کے مطابق مقتولین کو چاقوؤں اور کلہاڑیوں کے وار کر کے قتل کیا گیا ہے جن کی لاشوں کو ضابطے کی کارروائی کے لیے اسپتال منتقل کردیا گیا۔
پولیس نے جائے وقوعہ سے شواہد اکھٹے کر کے قتل کے واقعے کا پرچہ درج کر کے تحقیقات کا آغاز بھی کردیا ہے جبکہ میڈیکل رپورٹ آنے کے بعد قتل کا مقدمہ درج کیا جائے گا۔