مراکشی نوجوان دنیا کا بہترین قاری قرآن قرار

تلاوت قرآن کے مقابلوں میں دنیا بھر سے 40 ہزار امیدواروں نے شرکت کی

April 21, 2022

مراکشی نوجوان نے قرآت کا عالمی مقابلہ جیت لیا

NEW DELHI: مراکشی نوجوان نے سعودی عرب میں منعقدہ تلاوت قرآن پاک کا مقابلہ جیت کر 13 لاکھ ڈالرز سے زائد انعامی رقم اپنے نام کرلی۔

عرب میڈیا کے مطابق سعودی حکام کی جانب سے قرآن پاک کو خوش لحن انداز میں پڑھنے کے مقابلوں کا انعقاد کئی برسوں سے کیا جارہا ہے جس میں دنیا بھر سے قاری قرآن شرکت کرتے ہیں انتہائی خوبصورت لحن میں تلاوت قرآن پاک کرتے ہیں۔

رواں برس 80 ممالک سے 40 ہزار قاری قرآن نے شرکت کی، جس میں تمام امیدواروں نے بہترین ادائیگی اور خوش لحانی سے قرأت کی لیکن فاتح کا تاج مراکش کے یونس مصطفیٰ غربی نے اپنے سر سجایا اور 13 لاکھ 30 ہزار ڈالرز کا پہلا انعام جیتا۔

مقابلے میں دوسری پوزیشن برطانیہ کے محمد ایوب آصف نے حاصل کی جنہیں 5 لاکھ 33 ہزار ڈالرز کی انعامی رقم دی گئی، 2 لاکھ 76 ہزار ڈالرز کی تیسری رقم بحرین کے محمد مجاہد نے جیتی جب کہ ایران کے سیّد جاسم موسوی نے چوتھی حاصل کی اور 1 لاکھ 33 ہزار ڈالرز کا انعام جیتا۔

عرب میڈیا کے مطابق مقابلے کے فاتحین کا فیصلہ کرنے والے 13 رکنی بینچ میں مسجد نبوی اور مسجد الحرام کے مؤذن، دنیا کے بہترین قاری قرآن شامل تھے۔