کراچی میں مشتعل افراد نے 4 موٹر سائیکلوں کو آگ لگادی

ہنگامہ آرائی کے دوران علاقہ میدان جنگ بن گیا پولیس اور رینجرز کے پہنچنے پر ہنگامہ آرائی کرنے والے فرار ہوگئے

Staff Reporter April 24, 2022

ہنگامہ آرائی کے دوران علاقہ میدان جنگ بن گیا پولیس اور رینجرز کے موقع پر پہنچنے پر ہنگامہ آرائی کرنے والے فرار ہوگئے فوٹوایکسپریس

کراچی: قائدآباد کے علاقے لانڈھی اسپتال چورنگی کے قریب جھگڑے کے دوران مشتعل افراد نے گاڑیوں پر پتھراؤ کیا اور 4 موٹرسائیکلوں کو آگ لگا دی۔

کراچی کے علاقے قائدآباد کے علاقے لانڈھی اسپتال چورنگی کے قریب جھگڑے کے دوران مشتعل افراد نے گاڑیوں پر پتھراؤ کیا اور 4 موٹرسائیکلوں کو آگ لگا دی۔ ہنگامہ آرائی کے دوران علاقہ میدان جنگ بن گیا۔ پولیس اور رینجرز موقع پر پہنچ گئی جس پر ہنگامہ آرائی کرنے والے فرار ہوگئے۔

تفصیلات کے مطابق قائدآباد کے علاقے لانڈھی اسپتال چورنگی کے قریب ہفتہ اور اتوار کی درمیانی شب سحری سے قبل ہنگامہ آرائی کے دوران چند افراد ایک دوسرے سے گتھم گتھا ہوگئے اس دوران نامعلوم افراد نے گاڑیوں پر پتھراؤ کیا اور 4 موٹرسائیکلوں کو نذرآتش کر دیا۔

ہنگامہ آرائی کی اطلاع ملنے پر پولیس اور رینجرز کی بھاری نفری موقع پر پہنچ گئی، پولیس اور رینجرز کو دیکھ کر ہنگامہ آرائی اور گاڑیوں پر پتھراؤ کرنے والے گلیوں میں فرار ہوگئے۔ پولیس اور رینجرز نے اسپتال چورنگی اور اطراف کے علاقے میں ناکے لگا کر چیکنگ شروع کردی۔

پولیس کا کہنا ہے اطلاع ملی تھی کہ اسپتال چورنگی پر نائٹ کرکٹ میچ کھیلا جا رہا تھا کہ اس دوران کچھ لوگ وہاں سے گروپ کے صورت میں گزر رہے تھے جن کی بول لگنے پر کرکٹ کھیلنے والوں سے تلخ کلامی اور پھر ہاتھا پائی ہوئی تھی اسی دوران گاڑیوں پر پتھراؤ اور جلاؤ گھیراؤ کی اطلاع موصول ہوئی۔

جب پولیس اور رینجرز وہاں پہنچی تو شرپسند عناصر فرار ہونے میں کامیاب ہوگئے، واقعے کی تحقیقات کی جارہی ہیں، جلاؤ گھیراؤ میں ملوث افراد کو جلد گرفتار کر لیا جائے گا۔