تحریک انصاف کا پاکستان کی خودمختاری کیلیے ملین مارچ کا فیصلہ
20 لاکھ افراد کو اسلام آباد لانے کا فیصلہ، تیاری کے لیے کور کمیٹی اور پارلیمانی پارٹی کے اجلاس جلد طلب کیے جائیں گے
پاکستان تحریک انصاف نے پاکستان کی خودمختاری کے لیے ملین مارچ کا فیصلہ کیا ہے جس کے لیے 20 لاکھ افراد کو اسلام آباد لانے کی تیاری کی جائے گی۔
ایکسپریس نیوز کے مطابق تحریک انصاف کے چئیرمین عمران خان کی زیر صدارت پاکستان تحریک انصاف کی مرکزی قیادت کا اجلاس منعقد ہوا جس میں پاکستان کی آزادی و خودمختاری کے لیے ملین مارچ کے انعقاد کا فیصلہ کیا گیا۔
اجلاس میں فیصلہ کیا گیا کہ ملک بھر سے 20 لاکھ افراد پر مشتمل مارچ کو اسلام آباد لایا جائے گا ساتھ ہی مارچ کی تیاریوں میں تیزی، کور کمیٹی اور پارلیمانی پارٹی کے اجلاس طلب کرنے کا بھی فیصلہ کیا گیا۔ شرکا کو بتایا گیا کہ کور کمیٹی اور پارلیمانی پارٹی کے مشترکہ اجلاس 9 مئی کو منعقد ہوں گے۔
شرکا نے پاکستان کی آزادی و خودمختاری کے لیے حقیقی آزادی مارچ کی تیاریوں میں تیزی لانے کی حکمت عملی پر اتفاق کیا۔ ملک بھر سے تمام تنظیموں کے اجلاس بھی طلب کیے گئے۔
چیئرمین تحریک انصاف نے ملک بھر میں کارکنان کو انتخابات کی بھرپور تیاری کے آغاز کی بھی ہدایت کی۔