مدینے میں جوہوا یہ ان کے اپنے اعمال ہیں عمران خان

لوگ تکلیف میں نکل رہے ہیں عوام کے اندر غصہ ہے، عمران خان

ویب ڈیسک April 30, 2022

کبھی سوچ بھی نہیں سکتا کہ اس مقدس جگہ لوگوں کو آوازیں کسنے کی ہدایت دوں، عمران خان:فوٹو:فائل

پی ٹی آئی چئیرمین عمران خان کا کہنا ہے کہ مدینہ منورہ میں جو واقعہ ہوا یہ ان کے اپنے اعمال کی وجہ سے ہے۔

چئیرمین پی ٹی آئی عمران خان نے ایک انٹرویو میں مسجد نبوی ﷺ آنے والے واقعے پرردعمل دیتے ہوئے کہا کہ مدینے میں جو ہوا یہ ان کے اپنے اعمال کی وجہ سے ہے۔

عمران خان کا کہنا تھا کہ لوگ تکلیف میں نکل رہے ہیں عوام کے اندر غصہ ہے۔ ان لوگوں نے بیرونی سازش کا حصہ بن کر حکومت گرائی۔ میں کبھی سوچ بھی نہیں سکتا کہ اس مقدس جگہ لوگوں کو آوازیں کسنے کی ہدایت دوں۔کوئی عاشق رسول ﷺ ایسا کرنے کا سوچ بھی نہیں سکتا۔مدینہ میں جب یہ واقعہ ہوا تو ہمارے تمام کارکنان شب دعا منا رہے تھے۔

انہوں نے کہا کہ میرے دل میں جو رسول اللہ ﷺ کا مقام ہے وہ کسی کو ثابت کرنے کی ضرورت نہیں۔ میرا عقیدہ ہے کہ دل میں نبی کریم ﷺ کا عشق نہ ہو تو ایمان مکمل نہیں ہوتا۔ میں نے ہرفورم پراسلامو فوبیا کے خلاف آواز بلند کی ہے۔