ہیومن رائٹس کمیشن کا پی ٹی آئی رہنماوں کیخلاف توہین مذہب کے مقدمات واپس لینے کا مطالبہ

ہیومن رائٹس کمیشن آف پاکستان کی مقدمات کے حوالے سے ٹویٹ۔ فوٹو: فائل

---

LONDON: ہیومن رائٹس کمیشن آف پاکستان نے تحریک انصاف کے سینیئر رہنماوں کے خلاف سیکشن 295 اے کے تحت درج مقدمات فوری واپس لینے کا مطالبہ کر دیا۔

اپنی ٹویٹ میں ہیومن رائٹس کمیشن آف پاکستان نے کہا ہے کہ کوئی بھی حکومت یا سیاسی جماعت اپنے حریفوں کے خلاف توہین مذہب کے الزامات کو ہتھیار بنانے کی اجازت دینے کی متحمل نہیں ہو سکتی۔

The cases registered against senior PTI leaders under S. 295-A must be withdrawn immediately. No government or political party can afford to allow allegations of blasphemy to be weaponised against its rivals.

— Human Rights Commission of Pakistan (@HRCP87) May 1, 2022

واضح رہے کہ ملک کے مختلف حصوں میں پی ٹی آئی چیئرمین عمران خان سمیت دیگر رہنماؤں کے خلاف مسجد نبوی میں پیش آئے واقعے پر توہین مذہب کے مقدمات درج کیے گئے ہیں۔

اس حوالے سے پی ٹی آئی رہنما فواد چوہدری نے اسلام آباد ہائی کورٹ میں درخواست دائر کی جس میں وزیر داخلہ، سیکریٹری داخلہ، ڈی جی ایف آئی اے، پنجاب، سندھ، بلوچستان کے آئی جیز پولیس کو فریق بنایا گیا۔

مزید پڑھیں؛ عمران خان سمیت پی ٹی آئی قیادت کیخلاف ملک بھر میں درج توہین مذہب کے مقدمات چیلنج

اسلام آباد ہائی کورٹ کے جسٹس اطہر من اللہ نے درخواست پر فوری سماعت کرتے ہوئے اعلیٰ حکام کو حکم دیا کہ فواد چوہدری کو ہراساں نہ کیا جائے۔

سابق وزیر اطلاعات فواد چوہدری کا کہنا ہے کہ امپورٹڈ حکومت نے توہین مذہب کے کیسز سیاسی مخالفین کے خلاف استعمال کرنے کی کوشش کی لیکن آج تک پاکستان کی تاریخ میں کسی حکومت نے یہ حرکت نہیں کی۔