عمران نیازی سندھ کےعوام آپ کو گھاس بھی نہیں ڈالیں گے صوبائی وزیر شرجیل میمن
عمران نیازی کی شخصیت تضادات کا مجموعہ ہے، قوم ایسی متضاد شخصیت سے بچے، صوبائی وزیر کا مشورہ
QUETTA:
صوبائی وزیر شرجیل میمن نے عمران کو دو ٹوک جواب دیتے ہوئے کہا کہ سندھ کے عوام سیاسی طور پر باشعور ہیں، عمران خان جیسے مکار، جھوٹے اور گرے ہوئے شخص کے جھانسے میں کبھی نہیں آئیں گے۔
ان خیالات کا اظہار صوبائی وزیر اطلاعات، ٹرانسپورٹ و ماس ٹرانزٹ شرجیل انعام میمن نے عمران نیازی کے خطاب پر ردعمل دیتے ہوئے کیا ہے، انہوں نے کہا کہ سندھ پاکستان کا خودمختار صوبہ ہے اور عوام باشعور ہیں جو فیصلہ کرنا جانتے ہیں۔
شرجیل انعام میمن نے سابق وزیر اعظم کو مخاطب کرتے ہوئے کہا کہ 2018 کے عام انتخابات میں سندھ کے عوام نے نیازی کے امیدواروں کو دن میں تارے دکھائے تھے، اب عمران نیازی بھی اپنا شوق پورا کرلیں سندھ کے عوام آپ کو گھاس بھی نہیں ڈالیں گے۔
صوبائی وزیر نے سابق صدر زرداری سے متعلق کہا کہ آصف علی زرداری کی سیاسی بصیرت اور فیصلوں کو ان کے سخت ترین مخالفین بھی مانتے ہیں، انہوں نے 11 سال جیل کی سختیاں اور پھچلی تین دہائیوں سے جھوٹے مقدمات کا بہادری سے مقابلہ کیا ہے لیکن صدر زرداری پر کوئی الزام ثابت نہیں ہوا۔
شرجیل انعام میمن نے کہا کہ عمران نیازی تمہیں اپنے کرتوتوں کا جواب دینا ہوگا، سیاسی مخالفین پر الزامات لگا کر آپ بچ نہیں سکتے۔
وزیر اطلاعات سندھ نے سوال کیا کہ آٹا، چینی اویات، مالم جبہ ، بی آر ٹی ، تیل شارٹیج اسکینڈلز کا جواب دیں اور اپنے گھر سے شروع ہونے والے گپلوں کا بھی جواب دیں کہ فرح خان کو بیرون ملک کیوں بھگایا؟
صوبائی وزیر نے کہا کہ عمران نیازی کی شخصیت تضادات کا مجموعہ ہے جس کا مظاہرہ وہ اپنے عمل اور شر انگیز بیانات سے کرتے ہیں، عمران نیازی کا کوئی نظریہ نہیں ،قوم ایسی متضاد شخصیت سے بچے جو ملک کو شر کی طرف دھکیلنے کی ضد پر اڑے ہوئے ہیں۔
رہنما پیپلز پارٹی نے عمران خان کو مخاطب کرتے ہوئے کہا کہ پاکستان اور اس کے ریاستی ادارے اس شخص کے نزدیک کوئی وقعت نہیں رکھتے عمران نیازی خود کو پاکستان ،آئین اور قانون سے بالاتر سمجھتے ہیں۔
صوبائی وزیر اطلاعات سندھ نے کہا کہ پاکستان کو عمران نیازی کی ضد ، انا اور ہٹ دھرمی کی بھینٹ چڑھنے نہیں دیں گے، قومی قیادت اور پاکستان کی عوام عمران نیازی کے ملک دشمن پروپیگنڈا کا بھرپور جواب دے گی اقتدار سے محرومی نے اس شخص کو حواس باختہ کردیا ہے اوراپنے ہر محسن کو کاٹنے کو دوڑتا ہے ۔