ملک کے وسطی اور جنوبی میدانی اضلاع میں گردآلود ہوائیں اور جھکڑ چلنے کا امکان

فائل فوٹو

---

ملک کے وسطی اور جنوبی میدانی اضلاع میں بعداز دوپہر گردآلود ہواؤں اور جھکڑ چلنے کا امکان ہے جبکہ دیگر میدانی علاقے آج شدید گرمی کے زیر اثر رہیں گے۔

محکمہ موسمیات کے مطابق ملک میں 24 گھنٹوں کے دوران زیادہ سے زیادہ درجہ حرارت جیکب آباد میں 47، رحیم یار خان اور سبی میں 46، تربت، مٹھی، روہڑی، خیر پور اور نوشکی میں 45 جبکہ تفتان میں 44 ڈگری سینٹی گریڈ ریکارڈ کیا گیا۔

لاہور سمیت پنجاب کے بیشتر شہروں میں بھی موسم گرم اور خشک رہنے کا امکان ہے جبکہ پنجاب کے میدانی علاقے شدید گرمی کی لپیٹ میں رہیں گے۔پنجاب میں اگلے تین روز تک بارش کا کوئی امکان نہیں، لاہور میں آج زیادہ سے زیادہ درجہ حرارت 43 ڈگری سنٹی گریڈ تک رہنے کا امکان ہے۔

دوسری جانب، کوئٹہ سمیت صوبے میں گرمی کی لہر برقرار ہے، شہر میں درجہ حرارت 33ڈگری سینٹی گریڈ ریکارڈ کیا گیا۔