عروہ حسین کو شوبز انڈسٹری میں تمیز سیکھنے کی ضرورت ہے اعجاز اسلم

سنا ہے کہ ایک دو بار عروہ کی ڈائریکٹرز سے تلخی بھی ہوئی، اعجاز اسلم

ویب ڈیسک May 12, 2022

اعجاز اسلم نے نجی ٹی وی پر اپنا انٹرویو ریکارڈ کرایا ہے (فوٹو، فائل)

معروف اداکار اعجاز اسلم کا کہنا ہے کہ انہوں نے عروہ حسین کے ساتھ کام تو نہیں کیا لیکن سنا ہے کہ انہیں بہت جلدی غصہ آتا ہے، ایک دو بار اداکارہ کی ڈائریکٹرز سے تلخی بھی ہوئی اور اگر یہ سچ ہے تو انہیں انڈسٹری میں تمیز سیکھنے کی ضرورت ہے۔

میڈیا رپورٹ کے مطابق نجی ٹیلی ویژن پر ایک انٹرویو کے دوران اعجاز اسلم سے سوال ہوا کہ کسی ایسی اداکارہ کا نام بتائیں جس کے ساتھ آپ نے کام کیا ہو اور آپ کو لگتا ہے کہ انہیں مینرز(تمیز، آداب، طور طریقے) کی ضرورت ہے؟۔ جس پر اداکار نے تھوڑی دیر سوچنے کے بعد جواب دیا کہ ''عروہ حسین''، کیوں کہ ان کے بارے میں لوگوں سے سن رکھا ہے کہ وہ بہت جلد غصہ کر جاتی ہیں، ایک دو بار ڈائیکٹرز سے تلخی بھی ہوئی لیکن یہ جھوٹ بھی ہوسکتا ہے۔

انہوں نے وضاحت کی کہ میری یہ بات جھوٹ بھی ہوسکتی ہے کیوں کہ میرے پاس دونوں طرف کی رائے نہیں آئی اور نہ میں نے عروہ کو کسی سے بدتمیزی کرتے دیکھا، اداکارہ مجھ سے بہت اچھے سے پیش آتی ہیں۔

اعجاز اسلم کا مزید کہنا تھا کہ اگر جو باتیں سن رکھی ہیں وہ درست ہیں تو عروہ حسین کو تمیز سیکھنے کی ضرورت ہے۔