انوشکا شرما اپنی آنے والی فلم چکڑا ایکسپریس کیلئے کس سے ٹریننگ لے رہی ہیں

انوشکا شرما ایک بچے کی پیدائش کے بعد اداکاری کے میدان میں واپسی کے لیے تیار ہیں(فائل فوٹو)

---

بھارتی اداکارہ انوشکا شرما نے انکشاف کیا ہے کہ وہ اپنی آنے والی فلم چکڑا ایکسپریس کے لیے ویرات کوہلی سے بیٹنگ ٹپس لے رہی ہیں۔

بھارتی میڈیا رپورٹ کے مطابق اداکارہ انوشکا شرما ایک بچے کی پیدائش کے بعد اپنی نئی فلم چکڑا ایکسپریس کے ساتھ اداکاری کے میدان میں واپسی کے لیے تیار ہیں۔

ایک حالیہ انٹریو میں انوشکا شرما نے انکشاف کیا کہ وہ اپنی فلم کے لئے اپنے کرکٹر شوہر ویرات سے بیٹنگ کی تجاویز لے رہی ہیں اور ساتھ ہی انہیں اپنی کرکٹ ویڈیوز بھی دکھا رہی ہیں۔

انوشکا شرما نے کہا کہ وہ فلم میں بہترین اداکاری اور کرکٹ کھیلنے کے لئے سخت تیاری اور تربیت کر رہی ہیں کیونکہ وہ فلم میں مشہور بھارتی کرکٹر بولر جھولن گوسوامی کا کردار ادا کرنے والی ہیں۔

بھارتی میگزین سے بات کرتے ہوئے اداکارہ نے کہا کہ ویرات اور میں، میری تیاری اور پیش رفت پر تبادلہ خیال کرتے ہیں، میں ویرات کے ساتھ اپنی ویڈیوز شیئر کرتی ہوں تاکہ ان کی رائے حاصل کر سکوں، مجھے بولر کا کردار ادا کرنا ہے جس کے لئے میں اپنے کوچ کی زیادہ سُنتی ہوں جبکہ ویرات سے بیٹنگ کی ٹپس لیتی ہوں۔

View this post on Instagram

A post shared by AnushkaSharma1588 (@anushkasharma)

خیال رہے کہ سال کے آغاز میں چکڑا ایکسپریس میں اپنی اداکاری کا اعلان کرتے ہوئے انوشکا نے ایک خصوصی نوٹ بھی لکھا تھا۔

اداکارہ نے کہا تھا، "یہ واقعی ایک خاص فلم ہے کیونکہ یہ بنیادی طور پر زبردست قربانی کی کہانی ہے۔ چکڑا ایکسپریس سابق ہندوستانی کپتان جھولن گوسوامی کی زندگی سے متاثر ہے اور یہ خواتین کرکٹ کی دنیا میں آنکھ کھولنے والی فلم ہوگی۔ انہوں نے کہا کہ جب جھولن نے کرکٹر بننے اور عالمی سطح پر اپنے ملک کا نام روشن کرنے کا فیصلہ کیا، اُس وقت خواتین کے لیے اس کھیل کو کھیلنے کا سوچنا بھی بہت مشکل تھا۔

واضح رہے کہ انوشکا شرما کی مذکورہ فلم 2 فروری 2023 کو ریلیز کی جائے گی۔