سابق گورنر پنجاب عمر چیمہ کی برطرفی کیخلاف درخواست سماعت کیلئے مقرر

عمر چیمہ نے گورنر پنجاب کےعہدے سے ہٹانے کا اقدام اسلام آباد ہائیکورٹ میں چیلنج کیا ہے

---

DERA ISMAIL KHAN: اسلام آباد ہائیکورٹ نے سابق گورنر پنجاب عمر چیمہ کی برطرفی کیخلاف درخواست اعتراضات کے ساتھ سماعت کیلئے مقرر کردی۔

ہائی کورٹ کے چیف جسٹس اطہر من اللہ درخواست پر کل سماعت کریں گے۔ رجسٹرار آفس نے گورنر پنجاب کے عہدے سے برطرفی کے خلاف عمر سرفراز چیمہ کی درخواست پر اعتراض عائد کیا ہے۔

اسسٹنٹ رجسٹرار اسد خان نے درخواست پر اعتراض عائد کرتے ہوئے کہا کہ یہ معاملہ پنجاب کا ہے اس عدالت کا دائرہ کار نہیں بنتا ، متعلقہ دو فریقین کے خلاف یہ درخواست قابل سماعت نہیں ہے۔

قبل ازیں سابق گورنر پنجاب عمر سرفراز چیمہ نے عہدے سے ہٹانے کے اقدام کے خلاف ہائی کورٹ سے رجوع کیا۔ عمر سرفراز چیمہ نے وکیل بابر اعوان کے ذریعے اسلام آباد ہائی کورٹ میں درخواست دائر کرتے ہوئے موقف اختیار کیا کہ آئین کے مطابق گورنر صوبے میں صدر کا ایجنٹ ہے اور ایگزیکٹو کا حصہ نہیں ہے۔

انہوں نے کہا کہ صدر کی خوشنودی پر وہ عہدے پر قائم رہ سکتا ہے ، لیکن وزیراعظم شہباز شریف نے اپنے بیٹے حمزہ کو فائدہ پہنچانے کے لیے مجھے غیر قانونی طور پر عہدے سے ہٹایا ہے۔

عمر سرفراز چیمہ نے درخواست میں کہا کہ مجھے عہدے سے ہٹانے کا نوٹیفکیشن بغیر اختیار کے جاری کیا گیا اور یہ خلاف آئین ہے، مجھے ہٹانے سے صوبے میں آئینی بحران پیدا ہوا ہے۔

انہوں نے کہا کہ صوبہ دو ماہ سے بغیر کابینہ کے چل رہا ہے، کابینہ ڈویژن سے جس شخص نے مجھے ہٹانے کا نوٹیفکیشن جاری کیا یا کرایا ان کے خلاف کارروائی کا حکم دیا جائے، نوٹیفکیشن کو غیر قانونی قرار دے کر بطور گورنر عہدے پر بحال کیا جائے۔