مجھے آئی پی ایل میں شامل کرنے والی ٹیم خوش قسمت ہوگی عامر خان

عامر خان کو ’فوٹ ورک‘ پر کام کرنے کی ضرورت ہے، روی شاستری (فوٹو، فائل)

---

کراچی: بالی ووڈ کے سپر اسٹار عامر خان نے کہا ہے کہ مجھے انڈین پریمیئر لیگ (آئی پی ایل) میں شامل کرنے والی ٹیم خوش قسمت ہوگی، بھارتی ٹیم کے سابق کپتان روی شاستری کو میری سفارش کرنی چاہیے۔

میڈیا رپورٹ کے مطابق معروف اداکار نے گزشتہ ہفتوں ایک ویڈیو بنائی تھی جس میں وہ کہہ رہے تھے کہ اچھی کرکٹ کھیلتا ہوں، مجھے بھی آئی پی ایل میں شامل کیا جائے، جس پر روی شاستری نے اپنا ردعمل دیا کہ عامر خان کو 'فوٹ ورک' پر کام کرنے کی ضررت ہے جس کے بعد شاید کوئی ٹیم انہیں اپنے ساتھ رکھ لے۔

سابق بھارتی کپتان اور کوچ کے ردعمل پر عامر خان نے نئی ویڈیو جاری کی جس میں ان کا کہنا تھا کہ روی شاستری کے تبصرے سے مجھے مایوسی ہوئی، میرا فوٹ ورک بالکل ٹھیک ہے اور یہ جاننے کے لیے روی کو 'لگان' فلم دیکھنا ہوگی۔

اداکار نے یہ بھی کہا کہ جو بھی آئی پی ایل کی ٹیم مجھے موقع دے گی وہ خوش قسمت ٹیم ہوگی اور روی کو صحیح سے میری سفارش کرنی چاہیے۔