جامعات کی گرانٹ میں کٹوتی کا معاملہ ملازمین کا ہاؤس رینٹ بند

خط میں کہا گیا ہے کہ پہلے سے ملنے والا بجٹ ناکافی ہوتا ہے، حکومت نے جو 15 بلین روپے کی ضمنی گرانٹ کا اعلان کیا تھا مسلسل یاددہانی کے بعد وہ بھی تاحال ایچ ای سی کو جاری نہیں کی گئی۔

خط کے مطابق ملک کی سرکاری جامعات کی ضروریات 104.983 ارب روپے ہے، یہ گرانٹ خود ایچ ای سی کی جانب سے مانگی گئی ہے اس کے عوض محض 30 ارب روپے گرانٹ کے اجراء کی بات کی جارہی ہے جس کی فوری تصحیح کی ضرورت ہے۔

ایچ ای سی نے یہ بجٹ ڈیمانڈ 100 موجودہ جامعات، 18 نئی جامعات اور 49 انسٹی ٹیوٹ کے لیے ان کی ضروریات کو سامنے رکھ کر کی ہے اور آئندہ مالی سال 2022/23ء کے لیے مختص کی جانے والی 30 بلین روپے کی گرانٹ پر دوبارہ غور نہ کیا گیا تو ملک میں بے روزگاری کے ساتھ ساتھ نوجوانوں پر اس کے گہرے اثرات مرتب ہوں گے۔

خط میں یہ انکشاف بھی موجود ہے کہ یہ مالی سال 2016ء سے دی جانے والی جامعات کی گرانٹ ملک کے جی ڈی پی کا 0.14 فیصد تک ہے جبکہ ان برسوں میں نئی جامعات بنیں، مہنگائی بڑھی جس کے نتیجے میں آپریشنل اخراجات (یوٹیلیٹیز) بڑھ گئی اور وفاقی حکومت کی جانب سے مسلسل تنخواہوں اور پینشن میں اضافہ کیا جاتا رہا جس کے بعد اب سرکاری جامعات بدترین مالی بحران و خسارے سے دوچار ہیں۔