ہما قریشی ایک بار پھر نواز الدین صدیقی کی ہیروئن بنیں گی

ہما میراٹھی فلم ’’ہائی وے‘‘ میں بھی کام کررہی ہیں، یش راج بینرز نے بھی اپنی 3 فلموں میں کاسٹ کرلیا،ذرائع ۔ فوٹو: فائل

---

2012ء میں انوراگ کیشپ کی فلم گینگ آف واسیپورمیں کام کرنے والی جوڑی ہماقریشی اور نواز الدین صدیقی ایک مرتبہ پھر ایک ساتھ جلوہ گر ہوں گے ۔

بھارتی میڈیا کے مطابق ہدایتکار سری رام راگھوان نے ہما قریشی کو اپنی فلم جس کا ابھی نام نہیں رکھا گیا میں کاسٹ کرلیا ہے اور وہ فلم میں اداکار نواز الدین صدیقی کے مدمقابل اہم کردار ادا کریں۔ اطلاعات کے مطابق سیف علی خان کی پروڈکشن کمپنی کے زیر اہتمام بنائی جانیوالی فلم میں اداکار ورن دھاون مرکزی کردار ادا کررہے ہیں جب کہ ہما قریشی خواتین کے تین مرکزی کرداروں میں سے ایک پر پرفارم کریں گی ۔ زرائع کے مطابق نواز الدین صدیقی سے فلم کے متعلق گفتگو ہوچکی ہے اور انھوں نے کام کرنے پر رضامندی کا اظہار کردیا ہے اور اب معاہدہ ہونا باقی ہے جب کہ ہما قریشی کو پہلے ہی سائن کیا جاچکا ہے ۔اس سلسلہ میںر ابطہ کرنے پر نواز الدین صدیقی کا کہنا تھا کہ میری سری رام کی فلم کے متعلق بات چیت ہوئی ہے لیکن ابھی اس بارے میں کہناقبل از وقت ہوگا مگر اتنا ضرور کہوں گا کہ اسکرپٹ جاندار ہے دوسرے یہ کہ وہ میرے پسندیدہ ہدایتکاروں میں سے ہیں اور میں ہمیشہ ان کے ساتھ کام کرنا پسند کرتا ہوں۔

اطلاعات کے مطابق ورن دھاون کے اپریل مین عالیہ بھٹ کے ساتھ فلم ہمٹی شرما کی دلہنیا کی شوٹنگ سے فارغ ہوتے ہی اس فلم کی شوٹنگ شروع کردی جائیں گی ۔زرائع کے مطابق سری رام اداکار ورن دھاون کے مدمقابل مرکزی کردار کے لیے اداکارہ کی تلاش کررہے ہیں امیدہے کہ اسے چند روز میں فائنل کرلیا جائے گا اور یہ فلم ورن دھاون سمیت دیگر اداکاروں کے لیے ایک مختلف تجربہ ثابت ہوگی۔ دوسری طرف اطلاعات ہیں یشراج فلمز کے فلمساز ادیتہ چوپڑا نے ہماقریشی کو اپنی کمپنی یشراج فلمز کی آنیوالی تین فلموں کے لیے سائن کرلیا ہے تاہم اس سلسلہ میں اداکارہ کو ہدایت کی گئی ہے کہ وہ اپنی ان فلموں کے متعلق کسی سے کوئی بات نہ کرے زرائع کے مطابق ادیتہ چوپڑا اپنی ان فلموں کے متعلق کوئی بڑا اعلان کرنا چاہتے ہیں واضح رہے کہ یشراج فلمز نئے ٹیلنٹ کو متعارف کرانے میں بہت مشہور ہے اور اب تک کاجول ، رانی مکھر جی انوشکا شرما اور پرینیتی چوپڑا سمیت کئی نامور اداکاراؤں کو متعارف کرواچکا ہے کے فلمساز ادیتہ چوپڑا نے ہماقریشی کی حال ہی میں ریلیز ہونے والی فلموں کو دیکھا اور اس میں اس کی پرفارمنس کو سراہا ہے ۔

زرائع کا کہنا ہے کہ یشراج فلمز جلد ہی اپنی ایک فلم کا اعلان کردیگا جس میں ہماقریشی مرکزی کردار اداکررہی ہیں۔ ادھر اطلاعات کے مطابق ہما قریشی کو مراٹھی فلم ''ہائی وے'' میں بھی اہم کردار کے لیے سائن کرلیا گیاہے اس سلسلہ میں فلم کے رائٹر و اداکار گریش کلکرنی کا کہنا ہے کہ میراٹھی فلم '' ہائی وے'' کے فلمساز فلسازوں کا کافی دیر سے ہما قریشی سے رابطہ تھا اور انھوں نے اسے اس فلم کے لیے سائن کرلیا ہے انھوں نے بتایا کہ فلم کی ہدایات امیش کلکرنی دیں گے اور بالی ووڈ اداکارہ فلم میں اہم کردار ادا کررہی ہیں جب کہ اداکارہ ٹیسکا چوپڑا بھی ایک مضبوط کردار میں جلوہ گر ہوں گی ۔واضح رہے کہ ہما قریشی 28جولائی 1986 کو دہلی میں پیدا ہوئیں۔ ان کے والد سلیم قریشی ریسٹورنٹس کے مالک ہیں جب کہ والعدہ امینہ گھریلو خاتون ہیں ۔ہما قریشی نے ابتدائی تعلیم دہلی میں ہی تعلیم مکمل کرنے کے بعد گرجی کالج سے تاریخ میں آنرز کی ڈگری حاصل کی ۔

اس کے بعد اداکارہ نے ایک تھیٹر گروپ جوائن کرلیا اور اس کے تحت چند ڈراموں میں اپنی پرفارمنس دکھائی ۔2008 میں وہ فلم جنکشن کے آڈیشن کے سلسلہ میں ممبئی آگئی مگر بدقسمتی سے یہ فلم بنائی نہ بنائی جاسکی ۔ اس سلسلہ میں ہما قریشی کا کہنا ہے کہ میں نے کبھی ممبئی آنے اور ایک اداکارہ کے طور پر کام کرنے کا کبھی نہیں سوچا تھا لیکن اپنی دوستوں کے اصرار پر فلم جنکشن کے آڈیشن میں حصہ لیا جس میں کامیاب رہی اور مجھے اہم کردار میں سائن کرلیا گیا مگر یہ میری بدقسمتی تھی کہ اس فلم کو بنایا نہ جاسکا ۔ ہما قریشی دو سال تک مختلف اشتہاری فلموں میں عامر خان، شاہ رخ خان اور دیگر اداکاروں کے ساتھ نظر آتی رہیں۔ ایک اشتہار کی شوٹنگ کے دوران ہدایتکار انوراگ کشپ نے پرفارمنس سے متاثر ہوکر اپنی فلم میں کاسٹ کرنے کا وعدہ کرلیا ۔ ہما کا اس سلسلہ میں کہنا تھا کہ میں اس وقت ان پر اعتماد نہیں کرسکتی تھی کیونکہ فلم انڈسٹری میں ایسی باتیں عام تھیں مگر انوراگ کیشپ نے اپنا وعدے کو پورا کرتے ہوئے مجھے اپنی فلم میں کاسٹ کرلیا۔

ہما قریشی کی دو حصوں میں بنائی جانیوالی پہلی فلم '' گینگ آف ویسپر'' ویاکوم 18موشن پکچرز کے بینر تلے بنائی گئی اور اسے مئی 2012 مین کینز فلم فیسٹیول جب کہ اسی برس 22جون کو بھارت میں نمائش کے لیے پیش کیاگیا ۔92 ملین روپے سے تیار کی جانیوالی فلم باکس آفس پر 278.5 ملین کی کمائی کرکے کامیاب رہی اور جب کہ ہما قریشی کی پرفارمنس کو سراہتے ہوئے اسے اپنی پہلی ہی فلم میں بہترین اداکارہ کے ڈیوٹ اور بہترین معاون اداکارہ کے فلم فئیر ایوارڈز کے لیے نامزد کیا گیا ۔ اسی برس ہما کی ایک اور فلم ''لو شو تے چکن کھرانہ'' بھی سینما گھروں کی زینت بنی ۔ جب کہ فلم ''ترشنا''کے گانے پر پرفارم کیا۔2013میںاداکارہ کی3فلمیں''ایک تھی ڈائن'' ، ''شارٹس'' اور ڈی ڈے ریلیز ہوئیں جب کہ رواں برس کے دوران اداکارہ کی ایک فلم ڈیڑھ عشقیہ سینما گھروں کی زینت بنائی جاچکی ہے ۔ فلم ''عشقیہ'' کے سیکوئل میں ہما قریشی نے مادھوری ڈکشٹ ، ارشد وارثی اور نصیرالدین شاہ کے ساتھ پرفارم کیا یہ فلم باکس آفس پر ناکام رہی ۔ اطلاعات کے مطابق ہما کی ان دنوں ایک ساتھ 11ہدایتکاروں کی ہدایات میں بنائی جانیوالی فلم ''ایکس'' میں بھی اہم کردار اداکررہی ہیں تاہم اس فلم کو ریلیز کرنے کی تاریخ کا اعلان نہیں کیا گیاہے ۔