مولانا فضل الرحمان کا قومی سلامتی پالیسی کے خلاف ملک گیر احتجاج کا اعلان

قومی سلامتی پالیسی کے خلاف احتجاج کا سلسلہ ملتان سے شروع کریں گے، مولانا فضل الرحمان ۔ فوٹو: فائل

---

جے یو آئی(ف) کے سربراہ مولانا فضل الرحمان نے قومی سلامتی پالیسی کے خلاف ملک گیر احتجاج کا اعلان کیا ہے۔

ایکسپریس نیوز کے مطابق جمعیت علمائے اسلام (ف) کے سربراہ مولانا فضل الرحمان کا حکومت کی جانب سے پیش کی گئی قومی سلامتی پالیسی کے خلاف ملک گیر احتجاج کا اعلان کرتے ہوئے کہنا تھا کہ قومی سلامتی پالیسی کا اصل ہدف دینی مدارس ہیں اور جے یوآئی(ف) اس پالیسی کے خلاف ملک گیر احتجاج کرے گی۔ ان کا کہنا تھا کہ حکومت کی جانب سے قومی سلامتی پالیسی بناتے وقت ہم سے کسی قسم کی مشاورت نہیں کی گئی، اس پالیسی کے خلاف احتجاج کا سلسلہ ملتان سے شروع کریں گے جہاں ایک عظیم الشان جلسے کا انعقاد کیا جائے گا۔

طالبان سے مذاکرات سے متعلق بھی مولانا فضل الرحمان اپنے تحفظات کا اظہار کرتے ہوئے کہا کہ حکومت نے طالبان کے ساتھ مذاکرات کا درست راستہ اختیار نہیں کیا،حکومت مذاکرت پر نہ تو کوئی مشاورت کرتی ہے اور کوئی بھی دلیل سمجھنے سے بھی قاصرہے۔