ہتک عزت کیس میں میشا شفیع کو بڑا ریلیف مل گیا

سپریم کورٹ نے ہتک عزت کیس میں گلوکارہ میشا شفیع کی اپیل سماعت کے لیے منظور کر لی۔

رپورٹ کے مطابق سپریم کورٹ میں جسٹس قاضی فائز عیسیٰ کی سربراہی میں دو رکنی بنچ نے پیکا آرڈیننس کے سیکشن 20 کے خلاف میشا شفیع کی درخواست پر سماعت کی۔

سپریم کورٹ نے میشا شفیع کی درخواست پر فوجداری کیس میں حکم امتناع جاری کر تے ہوئے اگلی سماعت تک ہتک عزت پر میشا شفیع کے خلاف فوجداری کارروائی روکنے کا حکم دے دیا۔


سپریم کورٹ نے استفسار کیا کہ پیکا ایکٹ کےسیکشن 20 کو فوجداری بنانا آیا آئین کے آرٹیکل 19کی خلاف ورزی ہے ؟

سپریم کورٹ نے ریمارکس دیئے کہ گلوکارہ میشا شفیع کے خلاف سول مقدمہ جاری رہے گا، تاہم سپریم کورٹ نے عدالت کی معاونت کے لیے اٹارنی جنرل اور ایڈووکیٹ جنرل پنجاب کو نوٹس بھی جاری کر دیا گیا۔

عدالت نے لاہور ہائی کورٹ کے فیصلے کے خلاف میشا شفیع کی اپیل سماعت کے لیے منظور کر تے ہوئے کیس کی سماعت غیر معینہ مدت کے لیے ملتوی کردی۔