امریکا نے اقوام متحدہ میں تعینات شامی سفیر کے نیویارک چھوڑنے پر پابندی لگادی

امریکا کی جانب سے اس قبل شمالی کوریا اور ایران کے سفارتکاروں پر ایسی ہی پابندی عائد ہے۔ فوٹو: رائٹرز

---

امریکا نے اقوام متحدہ میں تعینات شام کے سفیر بشار جعفری کے نیویارک شہر چھوڑنے پر پابندی لگادی ہے جب کہ اس سے قبل یہ پابندی شمالی کوریا اورایران کے سفیروں پر بھی عائد ہے۔

غیرملکی خبر ایجنسی کے مطابق امریکی محکمہ خارجہ کی ترجمان کا کہنا تھا کہ اقوام متحدہ میں شام کے سفیر بشار جعفری کو ایک سفارتی پیغام کے ذریعے بتا دیا گیا ہے کہ وہ نیویارک شہر کے 40 کلومیٹر کے علاقے سے باہر نہیں جا سکتے۔ ترجمان نے کہا کہ بعض ممالک کے سفارت کاروں پر ایسی پابندیاں پہلے سے بھی عائد ہیں کہ اگر وہ 40 کلومیٹر کے علاقے سے باہر جانا چاہتے ہیں تو انہیں امریکا سے پیشگی اجازت لینا ہوگی۔

دوسری جانب شام کے حکومت مخالف گروپ نے امریکا کی جانب سے سفیر کے نیویارک شہر چھوڑنے پر پابندی کے فیصلے کا خیرمقدم کرتے ہوئے کہا ہے کہ شامی سفیر بشار جعفری گزشتہ 6 ماہ سے مسلسل امریکا کے مختلف شہروں میں دورے کرکے پروپیگنڈا کر رہے تھے۔