این اے 245 عامر لیاقت کے انتقال پر خالی نشست کیلئے انتخابات کا شیڈول جاری

(فوٹو: ٹوئٹر) این اے 245: عامر لیاقت کے انتقال پر خالی نشست کیلئے انتخابات کا شیڈول جاری

---

معروف ٹی وی میزبان اور رکن قومی اسمبلی عامر لیاقت کے انتقال کے باعث خالی ہونے والی نشست این اے 245 کے ضمنی انتخاب کا شیڈول جاری کردیا گیا۔

ایکسپریس نیوز کے مطابق الیکشن کمیشن کے جاری کردہ نوٹیفکیشن میں کہا گیا ہے کہ رکن قومی اسمبلی عامر لیاقت حسین کے کے انتقال کے باعث خالی ہونے والی نشست این اے 245 میں ضمنی انتخاب 27 جولائی کو ہوں گے۔

الیکشن کمیشن کے اعلامیے میں کہا گیا ہے کہ این اے 245 پر ضمنی انتخاب کیلئے 20جون کو امیدوار کاغذات نامزدگی حاصل کرسکیں گے جبکہ 22 سے 24 جون تک نامزدگی فارم جمع کرائے جاسکیں گے۔

نوٹیفکیشن میں مزید بتایا گیا ہے کہ 25 جون کو امیدواروں کی ابتدائی فہرست جاری ہوگی، 27 جون تک کاغذات کی جانچ پڑتال کی جائے گی۔ 5 جولائی کو امیدواروں کی حتمی فہرست جاری ہوگی اور 6 جولائی کو امیدوار دستبردار ہوسکیں گے جبکہ 7 جولائی کو انتخابی نشانات الاٹ ہونگے۔

مزید پڑھیں: ڈاکٹر عامر لیاقت حسین انتقال کرگئے

واضح رہے کہ ڈاکٹر عامر لیاقت حسین طبیعت خرابی کے سبب 9 جون کو انتقال کرگئے تھے، وہ 2002 سے سال 2007 کے درمیان رکن قومی اسمبلی رہے اور انھیں پرویز مشرف کے دور حکومت میں مذہبی امور کا وزیر بنایا گیا تھا۔