کھارادر بم دھماکے میں ملوث سندھ پولیس کے انتہائی اہم یونٹ کا اہلکار گرفتار

پولیس اہلکار کا تعلق علیحدگی پسند تنظیم سندھ ریولوشن آرمی (ایس آر اے) سے نکلا کو تخریبی کارروائیوں میں ملوث ہے (فوٹو : فائل)

---

سی ٹی ڈی نے کھارادر بم دھماکے میں ملوث پولیس اہل کار کو گرفتار کرلیا، ملزم کا تعلق سندھ پولیس کے انتہائی اہم یونٹ ریپڈ رسپانس فورس سے ہے۔

ایکسپریس کے مطابق سی ٹی ڈی نے اندرون سندھ میں کارروائی کرتے ہوئے پولیس اہلکار دلبر علی کو گرفتار کیا ہے جو ک ریپڈ ریسپانس فورس (آر آر ایف) میں تعینات ہے۔ یہ فورس سفارت خانوں، غیر ملکی باشندوں سمیت اہم تنصیبات پر سیکیورٹی کے فرائض سر انجام دیتی ہے۔

سی ٹی ڈی ذرائع نے بتایا کہ ملزم کا تعلق علیحدگی پسند تنظیم سندھ ریولوشن آرمی (ایس آر اے) سے ہے، ملزم رقم تقسیم کرنے اور دیگر امور میں ملوث رہا ہے، ملزم بم دھماکے میں ملوث ہے، گزشتہ ماہ کھارادر کپڑا مارکیٹ میں بم دھماکے میں ایک خاتون جاں بحق جبکہ 14 افراد زخمی ہوگئے تھے، ملزم سے تحقیقات کا آغاز کردیا گیا ہے۔

یہاں یہ بات قابل ذکر ہے کہ ریپڈ رسپانس فورس سندھ پولیس کا انتہائی اہم یونٹ ہے، آر آر ایف کے اہل کار سفارت خانوں اور غیر ملکیوں کی سیکیورٹی کے علاوہ سندھ پولیس کے ہیڈ آفس، کراچی پولیس کے ہیڈ آفس کے ساتھ ساتھ دیگر اہم تنصیبات پر بھی تعینات ہوتے ہیں۔