آئی سی سی نے خزانے مزید بھرنے کی ٹھان لی

مینز اور ویمن کرکٹ ایونٹس کیلیے الگ میڈیا رائٹس بڈز موصول ہوں گی

Sports Reporter June 18, 2022

مینز اور ویمن کرکٹ ایونٹس کیلیے الگ میڈیا رائٹس بڈز موصول ہوں گی :فوٹو:فائل

بھارت کے بعد آئی سی سی نے بھی میڈیا رائٹس کی فروخت سے خزانے بھرنے کی ٹھان لی۔

آئی سی سی ایونٹس کے میڈیا رائٹس کی فروخت کیلیے کارروائی کا آغاز ہوگیا، 2024سے شروع ہونے والے نئے سائیکل میں 16 مینز اور 8 خواتین کے ٹورنامنٹ شامل ہوں گے،اس دوران مجموعی طور پر 465 میچز کھیلے جائیں گے۔

ٹینڈرز کی طلبی کیلیے کارروائی کا عمل پیر سے شروع کیا جارہا ہے، اس بار مینز اور ویمنز ایونٹس کیلیے الگ بڈز موصول ہوں گی، تمام امیدوار ایک بڈ 4 سال، دوسری 8 سال کے دورانیے کیلیے جمع کرائیں گے، حتمی فیصلہ ستمبر میں ہونے والی آئی سی سی بورڈ میٹنگ کے دوران سامنے آئے گا۔

چیف ایگزیکٹو جیف ایلر ڈائس نے کہا کہ کرکٹ کے مقابلوں پر ایک ارب کے قریب شائقین کی نظر ہوتی ہے،آئندہ سرکل میں بھی ان کو شاندار مقابلے دیکھنے کو ملیں گے،امید ہے کہ میڈیا رائٹس کے حصول کیلیے کمپنیز کی گہری دلچسپی دیکھنے میں آئے گی۔

حکام کا کہنا ہے کہ امیدوار کے سوا دیگر کی تفصیلات جاری نہیں کی جائیں گی، حال ہی میں بھارت نے انڈین پریمیئر لیگ (آئی پی ایل) کے 2023 سے 2027 کے دوران 410 میچز کے میڈیا رائٹس تقریبا 400 ارب سے زائد بھارتی روپوں میں فروخت کیے گئے ہیں۔

مزید پڑھیں: آئی پی ایل کے براڈ کاسٹ رائٹس کتنے میں فروخت ہوئے؟

دوسری جانب آئی پی ایل کی الیکٹرونک آکشن نہ کیے جانے، 4 اور 8 سال کی الگ الگ بڈز طلب کرنے سمیت بھارتی میڈیا میں مختلف سوالات اٹھائے جارہے ہیں۔ رواں سال آئی پی ایل کی بڈنگ کاعمل ای آکشن کے ذریعے ہوا تھا۔

واضح رہے کہ آئی پی ایل کے میڈیا رائٹس سے بھارتی کرکٹ بورڈ (بی سی سی آئی) کو تقریبا 500 ارب روپے آمدنی کی توقع ہے۔