بورڈ آف ڈائریکٹرز نے پرال کے آڈٹ شدہ اکاؤنٹس کی منظوری دیدی

سی ای اوکو کمرشل پراجیکٹس کیلیے تفصیلی پراجیکٹ کاسٹنگ پلان تیار کرنے کی بھی ہدایت

Irshad Ansari March 08, 2014

سی ای اوکو کمرشل پراجیکٹس کیلیے تفصیلی پراجیکٹ کاسٹنگ پلان تیار کرنے کی بھی ہدایت. فوٹو: فائل

لاہور: پاکستان ریونیو آٹومیشن لمیٹڈ(پرال)کے بورڈ آف ڈائریکٹرز نے 30 جون 2013 کو ختم ہونیوالے مالی سال کیلیے پاکستان ریونیو آٹومیشن لمیٹڈ کے آڈٹ شُدہ اکاؤنٹس کی منظوری دیدی ہے ۔

تاہم پرال کے چیف ایگزیکٹو آفیسر کو ہدایت کی گئی ہے کہ آئندہ اجلاس میں کوڈ آف کارپوریٹ گورننس رُولز 2013 پر عملدرآمد کیلیے منصوبہ پیش کیا جائے۔ اس ضمن میں ''ایکسپریس'' کو دستیاب دستاویزکے مطابق یہ منظوری چار مارچ کو چیئرمین فیڈرل بورڈ آف ریونیو اور پرال بورڈکے چیئرمین طارق باجوہ کی زیر صدارت ہونے والے پرال بورڈ آف ڈائریکٹرز کے اجلاس میں دی گئی۔ دستاویز کے مطابق اجلاس میں پاکستان ریونیو آٹومیشن لمیٹڈ کے چیف ایگزیکٹو آفیسر کو ہدایت کی گئی ہے کہ کمرشل پراجیکٹس کیلیے تفصیلی پراجیکٹ کاسٹنگ پلان بھی تیار کیا جائے۔

اس کے علاوہ پرال کی طرف سے اپنے کلائنٹس کے ساتھ سروسز کی فراہمی کے کیے جانیوالے معاہدوں کی تجدید پر کلائنٹس کے ساتھ سروس چارجز بڑھانے کیلیے مذاکرات کیے جائیں۔ دستاویزکے مطابق پرال کے سی او کو یہ بھی ہدایت کی گئی ہے کہ پاکستان ریونیو آٹومیشن لمیٹڈ(پرال)کے اخراجات میں کمی اور کمپنی رُولز میں بہتری کیلیے جامع منصوبہ تیار کرکے پرال بورڈ آف ڈائریکٹرز کے آئندہ اجلاس میں پیش کیا جائے۔