مویشی منڈی سے جانور چرانے والا گروہ گرفتار خواتین بھی شامل
منڈی سے جانور چرانے والے گروہ میں چار خواتین اور دو مرد شامل ہیں
بیوپاریوں نے مویشی منڈی سے جانور چرانے والا چھ رکنی گروہ پکڑ کر پولیس کے حوالے کردیا۔
ایکسپریس نیوز کے مطابق کراچی میں لگنے والی دنیا کی سب سے بڑی مویشی منڈی میں جانوروں کو لیکر فرار ہونے والا گروہ بیوپاریوں کے ہتھے چڑھ گیا۔
چھ افراد پر مشتمل گروہ میں چار خواتین بھی شامل ہیں، گروہ کے افراد خریدار بن کر بیوپاری سے بچھڑے کے بھاؤ تاؤ کررہے تھے کہ اچانک دوسرے افراد جانور کی رسی کھول کر چلاتے ہوئے بچھڑے کو بھگا کر لے گئے۔
بچھڑا چوری ہوتا دیکھ کر بیوپاری نے شور مچایا تو موقع پر موجود افراد اور منڈی کی انتظامیہ نے قانون نافذ کرنے والے ادارے کے اہلکاروں کی مدد سے بچھڑا لے جانے والے شخص کو کچھ دور جاکر پکڑ لیا۔
ذرائع کا کہنا ہے کہ رش کا فائدہ اٹھاتے ہوئے مذکورہ گروہ کے چھ افراد کافی دور نکل گئے تاہم وہ منڈی سے باہر نکلنے میں کامیاب نہیں ہوسکے اور تعاقب کرتے ہوئے افراد کو انھیں پکڑنے میں کامیابی حاصل ہوئی اور بچھڑا بھی برآمد کرلیا گیا۔
ذرائع کا کہنا ہے کہ گروہ کو مزید قانونی کارروائی کے لیے پولیس کے حوالے کردیا گیا۔