ٹی 20 رینکنگ حفیظ کی نمبر ون پوزیشن کیلیے کوئی چیلنج نہ بن سکا

آفریدی ٹاپ 5 کے آخری شریک، سعید اجمل کیلیے دوسرے بہترین بولر کا اعزاز

Sports Desk March 08, 2014

آفریدی ٹاپ 5 کے آخری شریک، سعید اجمل کیلیے دوسرے بہترین بولر کا اعزاز۔ فوٹو: رائٹرز/فائل

آئی سی سی ٹی 20 کی نئی رینکنگ میں پاکستانی کپتان محمد حفیظ کی نمبر ون پوزیشن کیلیے کوئی چیلنج نہ بن سکا۔

ایشیا کپ میں جارحانہ چھکوں سے دھوم مچانے والے شاہد آفریدی مختصر طرز کی کرکٹ میں پانچویں بہترین آل رائونڈر بنے ہوئے ہیں،16 مارچ سے بنگلہ دیش میں شروع ہونے والے آئی سی سی ورلڈ ٹی 20 سے قبل آسٹریلیا اور جنوبی افریقہ جبکہ انگلینڈ و ویسٹ انڈیز 3،3 میچز کی سیریز کھیلیں گے، اس کے نتائج ان ٹیموں کی عالمی درجہ بندی میں اثرانداز ہوسکتے ہیں، موجودہ رینکنگ میں سری لنکا ٹاپ پوزیشن پر براجمان ہے، بھارت دوسرے، جنوبی افریقہ تیسرے اور پاکستان چوتھے نمبر پر موجود رہا،آخرالذکر چاروں ٹیموں کو محض 8 ریٹنگ پوائنٹس نے دور کررکھا ہے، ویسٹ انڈیز پانچویں، آسٹریلیا چھٹے، نیوزی لینڈ ساتویں ، انگلینڈ آٹھویں، آئرلینڈ نویں اور بنگلہ دیش 10ویں پوزیشن پر ہے، آسٹریلیا اور انگلینڈ کے پاس آنے والی سیریز میں کلین سوئپ کی صورت اپنی پوزیشنز بہتر بنانے کا موقع ہے۔

جنوبی افریقہ بھی تمام میچز جیت کر بھارت سے دوسری پوزیشن چھین سکتا ہے، ویسٹ انڈیز سیریز جیتنے پر اپنی موجودہ پوزیشن برقرار رکھ پائے گا۔ بیٹنگ میں کیوی کپتان برینڈن میک کولم نمبرون ہیں، انگلینڈ کے الیکس ہیلز دوسرے اور بھارتی بیٹسمین ویرت کوہلی تیسری پوزیشن پر رہے، کپتان محمد حفیظ 18ویں درجے کے ساتھ ٹاپ 20 میں شریک واحد پاکستانی ہیں، بولنگ میں ویسٹ انڈین اسپنر سنیل نارائن کا پہلا نمبر ہے،پاکستانی جادوگر بولر سعید اجمل دوسری پوزیشن پر قدم جمائے ہوئے ہیں،اجنتھامینڈس تیسرے، ناتھن میک کولم چوتھے، محمد حفیظ پانچویں اور شاہد آفریدی11ویں نمبر پر ہیں۔آل رائونڈرز میں حفیظ کی حکمرانی قائم ہے، شین واٹسن دوسرے، یوراج سنگھ تیسرے، شکیب الحسن چوتھے اور شاہد آفریدی پانچویں نمبر پر رہے۔