ایف پی سی سی آئی کی بڑی صنعتوں پر سپر ٹیکس کی شدید مذمت

بڑی صنعتیں پہلے ہی 29 فیصد کا بھاری کارپوریٹ ٹیکس ادا کرتی ہیں اور ملک میں لاکھوں ملازمتیں بھی پیدا کرتی ہیں، شبیرمنشا

Business Reporter June 25, 2022

بڑی صنعتیں پہلے ہی 29 فیصد کا بھاری کارپوریٹ ٹیکس ادا کرتی ہیں اور ملک میں لاکھوں ملازمتیں بھی پیدا کرتی ہیں، شبیرمنشا۔ فوٹو: فائل

ISLAMABAD: ایف پی سی سی آئی نے بڑی صنعتوں پر 10 فیصد سپر ٹیکس کے نفاذ کی سختی سے مذمت کی ہے۔

ایف پی سی سی آئی کے قائم مقام صدر شبیر منشا نے بڑی صنعتوں پر 10 فیصد سپر ٹیکس کے نفاذ کی سختی سے مذمت کی ہے جو پہلے ہی 29 فیصد کا بھاری کارپوریٹ ٹیکس ادا کرتی ہیں اور ملک میں لاکھوں ملازمتیں بھی پیدا کرتی ہیں۔

انھوں نے مزید کہا کہ دنیا کا کوئی بھی ملک کارپوریشنوں سے 39 فیصد ٹیکس وصول کرتے ہوئے معیشت کا پہیہ رواں دواں نہیں رکھ سکتا۔ مزید برآں، نجی شعبے اور غیر ملکی سرمایہ کاروں کی طرف سے کی جانے والی انویسمنٹ اس طرح کے کاروبار مخالف حالات میں مکمل طور پر ختم ہو جاتی ہے۔

شبیر منشا نے وضاحت کی کہ متاثر ہونے والی صنعتوں میں تمام بڑی صنعتیں شامل ہوں گی۔ یعنی سیمنٹ، اسٹیل، چینی، تیل اور گیس، کھاد، ایل این جی ٹرمینلز، ٹیکسٹائل، بینکنگ، آٹوموبائل، سگریٹ، مشروبات، کیمیکلز اور ایئر لائنز؛ جو کل 13 صنعتیں بنتی ہیں۔ مزید برآں، باقی تمام صنعتوں پر بھی 4 فیصد اضافی ٹیکس عائد کر دیاگیا ہے۔