آریان خان نے اپنے پاسپورٹ کے حصول کیلئے عدالت سے رجوع کرلیا

BRUSSELS:
بالی ووڈ کے سپر اسٹار شاہ رخ خان کے بیٹے آریان خان نے منشیات کیس میں کلین چٹ ملنے کے بعد اپنے پاسپورٹ کے حصول کیلئے عدالت سے رجوع کرلیا ہے۔

میڈیا رپورٹ کے مطابق آریان خان نے اپنے وکلا کے ذریعے بھارت کی خصوصی عدالت میں اپنی درخواست جمع کرادی جس میں مطالبہ کیا گیا ہے کہ وہ منشیات کیس سے بری ہوچکے ہیں لہذا ضمانت کی شرط پر رکھوایا گیا پاسپورٹ انہیں واپس کیا جائے۔


رپورٹ میں بتایا گیا کہ معروف اداکار کے بیٹے کی درخواست پر خصوصی عدالت نے نارکوٹکس کنٹرول بیورو(این سی بی) کو اس ضمن میں جواب جمع کرانے کی ہدایت کردی ہے۔

آریان خان کی درخواست پر خصوصی عدالت میں رواں ماہ(جولائی) کی 13 تاریخ کو سماعت ہوگی۔

یاد رہے کہ گزشتہ سال 3 اکتوبر کو این سی بی نے شاہ رخ خان کے بیٹے کو منشیات کیس میں گرفتار کیا تھا بعد ازاں ناکافی ثبوت ہونے کی بنا پر عدالت نے انہیں مقدمے سے کلین چٹ دی۔