رواں برس 10 لاکھ مسلمان فریضۂ حج ادا کریں گے

کورونا وبا کے دو برسوں بعد پہلی بار اتنی بڑی تعداد میں فرزندگان توحید فریضۂ حج ادا کریں گے

ویب ڈیسک July 01, 2022

دو سال بعد بیرون ملک سے بھی عازمین حج آئیں گے، فوٹو: فائل

کورونا کی پابندیوں کے خاتمے کے بعد اس سال 10 لاکھ مسلمان حج ادا کریں گے اور دو سال بعد پہلی بار خانہ کعبہ میں فرزندگان توحید کی اتنی بڑی تعداد جمع ہوگی۔

ذی الحج کے مہینے کا آغاز ہوتے ہی حجاج کرام مکہ پہنچنا شروع ہوگئے۔ اب تک 3 لاکھ 12 ہزار 982 عازمین حج مدینہ پہنچ چکے ہیں۔ اس سال بیرون ملک سے بھی عازمین کو آنے کی اجازت دی گئی ہے۔

کورونا وبا کے دوران دو سال کے بعد یہ پہلا موقع ہے جب بیرون ملک سے بھی حاجیوں کو آنے کی اجازت دی گئی ہے ورنہ گزشتہ دو برسوں میں صرف سعودیہ میں مقیم افراد کو حج کی اجازت تھی وہ بھی انتہائی قلیل تعداد میں۔ اس لیے اس بار مذہبی جوش و خروش دیدینی ہے۔

سعودی ولی عہد محمد بن سلمان نے اس عزم کا اظہار کیا ہے کہ آئندہ برس سے عمرے اور حج کے لیے مجموعی طور پر 3 کروڑ مسلمانوں کے انتظامات کیے جائیں گے اور جددید ترین سہولیات فراہم کی جائیں گی۔