ایکسپریس کے تعاون سے گلاب گینگ کا سنے اسٹار میں پریمیئر

ایکسپریس میڈیا گروپ کے تعاون سے زیرنمائش فلم ''گلاب گینگ'' کا پریمیئر گزشتہ روز تاج سنے اسٹار سینما میں ہوا جس میں اداکارہ فضا علی، جویریہ عباسی، خاور ریاض اور مریم ممدوٹ سمیت مختلف شعبہ ہائے زندگی سے تعلق رکھنے والی شخصیات نے شرکت کی۔


فلم میں مادھوری ڈکشت اور جوہی چائولہ جو پہلی مرتبہ اکٹھے کام کررہی ہیں۔ ان کی زبردست پرفارمنس کو شرکا نے بے حد سراہتے ہوئے کہا کہ حقوق نسواں کی جدوجہد میں ''گلاب گینگ'' ایک مؤثر کاوش ہے جس میں فلم میکر نے بھارتی ریاست مدھیہ پردیش میں خواتین کے حقوق کیلئے سرگرم دیہاتی خواتین کے ایک گروپ کیلیے جدوجہد کو شاندار انداز میں خراج تحسین پیش کیا ہے۔ انھوں نے کہا کہ فلم ایک ایسا میڈیم ہے جس کے ذریعے تفریح کے ساتھ سول سوسائٹی کے مسائل کو سامنے لایا جاسکتا ہے۔ ''گلاب گینگ'' میں بالی ووڈ کی معروف اداکارائوں جوہی چائولہ اور مادھوری ڈکشت کو پہلی بار آمنے سامنے دیکھ کر بہت لطف اندوز ہوئے ہیں۔

خاص طور پر جوہی چائولہ جو اس فلم میں منفی کردار کر رہی ہیں نے یہ ثابت کردیا ہے کہ فنکار کسی بھی کردار میں خود کو ڈھال سکتا ہے۔مادھوری ڈکشٹ گلابی ساڑھی میں بھرپور ایکشن کرتے ہوئے کمال لگی ہیں۔ شرکا نے کہا کہ معیاری فلمیں سینما انڈسٹری کی ترقی کا باعث بنتی ہیں۔ پاکستانی فلمسازوں کو بھی روایت سے ہٹ کر نئے موضوعات پر فلمیں بنانا چاہئیں۔ انھوں نے ایکسپریس میڈیا گروپ کی طرف سے معیاری فلموں کی حوصلہ افزائی کی بھی تعریف کی۔