آئی پی ایل ونڈو کی مخالفت رمیز راجا آج انگلینڈ روانہ ہوں گے

انڈین پریمئیر لیگ کے طویل دورانیے سے پاکستان بین الااقوامی کرکٹ سے محروم ہوسکتا ہے

Sports Reporter July 12, 2022

(فوٹو: ٹوئٹر) انڈین پریمئیر لیگ کے طویل دورانیے سے پاکستان بین الااقوامی کرکٹ سے محروم ہوسکتا ہے

کراچی: پاکستان کرکٹ بورڈ (پی سی بی) کے چیئرمین رمیز راجا انٹرنیشنل کرکٹ کونسل (آئی سی سی) کی سالانہ میٹنگ میں شرکت کیلئے آج انگلینڈ روانہ ہوں گے۔

ایکسپریس نیوز کے مطابق چیئرمین پی سی بی رمیز راجا 15 اور 16 جولائی کو شیڈول ایم سی سی کرکٹ کمیٹی کی میٹنگ میں شریک ہوں گے، بعدازاں برمنگھم گیمز سے قبل آئی سی سی کی سالانہ بورڈ میٹنگز 23 سے 26 جولائی تک ہوں گی، جس میں فیوچر ٹور پروگرامز اور پاکستان کی جانب سے آئی پی ایل ونڈو میں توسیع کی مخالفت میں موقف اپنایا جائے گا۔

اسی ملاقات میں رمیز راجا سالانہ 4 ملکی ٹورنامنٹ کے حوالے سے بھی بات چیت آگے بڑھانے کی کوشش کریں گے، جس میں پاکستان، بھارت، آسٹریلیا اور انگلیںڈ شامل ہیں۔

مزید پڑھیں: آئی پی ایل؛ طویل ونڈو سے پاکستان کرکٹ کو نقصان ہوگا

قبل ازیں گزشتہ ماہ انڈین کرکٹ بورڈ (بی سی سی آئی) نے آئی پی ایل کے لیے بطور خاص ڈھائی ماہ کی ونڈو مختص کرنے کا اعلان کیا تھا، پاکستانی کرکٹرز بھارت کے ساتھ سیاسی روابط نہ ہونے کے سبب ایونٹ میں حصہ لینے سے محروم ہیں لیکن ٹورنامنٹ کو ڈھائی ماہ تک بڑھانے سے پاکستان کو بین الااقوامی کرکٹ سے بھی دور رہنا پڑے گا۔

واضح رہے کہ بی سی سی آئی کا منصوبہ تمام ٹاپ انٹرنیشنل کرکٹرز کی اپنے ایونٹ میں شرکت لازمی بنانے کا ہے، اس سے باہمی انٹرنیشنل سیریز پر منفی اثرات مرتب ہوسکتے ہیں۔