کراچی میں قتل وغارت جاری مختلف واقعات میں 3 خواتین سمیت 6 افراد ہلاک

پرتشدد واقعات میں ہلاک ہونے والوں میں 3 خواتین بھی شامل ہیں فوٹو : فائل

---

RAWALPINDI: پولیس اور رینجرز کے دعوؤں کے باوجود روشنیوں کے شہر میں قتل وغارت کا بازار گرم اور ہر روز کئی خاندان اپنے پیاروں کے لاشے اٹھانے پر مجبور ہیں۔ آج بھی مختلف علاقوں میں پیش آنے والے واقعات میں 3 خواتین سمیت 6 افراد کو موت کے گھاٹ اتار دیا گیا ہے۔

ایکسپریس نیوز کے مطابق لانڈھی کے علاقے گل احمد کے قریب نامعلوم افراد نے گھر میں گھس کر اندھا دھند فائرنگ کردی جس کے نتیجے میں گھر میں موجود خاتون سمیت 2 افراد جاں بحق جبکہ ملزمان کارروائی کے بعدباآسانی فرار ہوگئے۔ گلشن اقبال بلاک 13 ڈی کے ایک مکان سے بھی دو خواتین کی تشدد زدہ لاشیں برآمد ہوئی ہیں ، پولیس کا کہنا ہے کہ دونوں خواتین کی لاشیں کم از کم دو روز پرانی ہیں۔

دوسری جانب سائٹ ایریا کے بازار کے قریب بھی نامعلوم افراد نے فائرنگ کرکے ایک شخص کو موت کے گھاٹ اتار دیا۔ اس کے علاوہ پولیس نے مواچھ گوٹھ میں مبینہ پولیس مقابلے کے دوران ایک ملزم کو ہلاک کرنے کا دعوی کیا ہے، ایس ایس پی سٹی فاروق بشیر کا کہنا ہے کہ ملزم نصیر بلوچ گینگ وار کا اہم کارندہ اور گزشتہ روز ہونے والے 5 افراد کے قتل میں ملوث تھا۔