سرگودھا بچوں کے جھگڑے میں بڑے کود پڑے 3 بھائی جاں بحق 3 زخمی

ایک گروپ کے ملزمان نے دوسرے کے گھر میں گھس کر فائرنگ کی (فوٹو فائل)

---

بچوں کے درمیان ہونے والے جھگڑے میں بڑے کود پڑے، جس کے نتیجے میں 3 سگے بھائی جاں بحق اور 3 شدید زخمی ہو گئے۔

سرگودھا کی تحصیل بھیرہ کے نواحی قصبے ہاتھی ونڈ میں بچوں کے مابین شروع ہونے والا معمولی جھگڑا مسلح تصادم کی صورت اختیار کرگیا، جس کے نتیجے میں 3 افراد جاں بحق اور 3 شدید زخمی ہو گئے۔ پولیس کے مطابق جاں بحق اور زخمی سب آپس میں بھائی ہیں۔

پولیس کے مطابق ایک گروپ کے ملزمان نے دوسرے کے گھر میں گھس کر فائرنگ کی، جس میں محمد اسلم، نواز اور شاہد عمران جاں بحق ہو گئے۔ ملزمان فائرنگ کے بعد فرار ہو گئے، جن کی تلاش شروع کردی گئی ہے۔ آئی جی پنجاب راؤ سردار علی خان نے فائرنگ کے واقعے کا نوٹس لے لیا اور آر پی او سرگودھا سے رپورٹ طلب کرتے ہوئے ملزمان کی جلد از جلد گرفتاری کا حکم دیا ہے۔

واقعے کی اطلاع ملتے ہی سینئر پولیس افسران نے جائے وقوع کا دورہ کیا۔ ڈی پی او سرگودھا بلال ظفر شیخ کے مطابق کرائم سین یونٹ اور فرانزک ٹیموں کی مدد سے تمام شواہد اکٹھے کیے جارہے ہیں جب کہ ملزمان کی گرفتاری کے لیے ٹیمیں تشکیل دے دی گئی ہیں۔