ناپا میں آج برطانوی کھیل ’’بلیک ٹی شرٹ کلیکشن‘‘ پیش کیا جائیگا

ناپا میں پیش کیے جانے والے تھیٹر ڈرامہ ’’اسٹیمپ‘‘ میں فنکار اپنے فن کا مظاہرہ کر رہے ہیں۔ فوٹو: ایکسپریس

---

نیشنل اکیڈمی آف پرفارمنگ آرٹس (ناپا) کے زیر اہتمام ہونیوالا عالمی تھیٹر میلہ کامیابی سے جاری ہے، میلے میں پیش کیے جانیوالے تمام ڈراموں نے زبردست مقبولیت اور پذیرائی حاصل کی۔

تھیٹر ڈراموں کی کامیابی نے تھیٹر دیکھنے والوں کو عمدہ تفریح فراہم کی بھارتی اداکار نصیر الدین شاہ اپنا ڈرامہ ''عصمت آپا '' کامیابی سے پیش کرکے بھارت جاچکے ہیں دیگر ممالک کے ڈرامے ان دنوں پیش کیے جارہے ہیں، انگلینڈ فیول تھیٹر کا شمار برطانیہ کے مشہور ڈرامہ گروپ میں ہوتا ہے جو عالمی تھیٹر میلے میں شرکت کے لیے پاکستان آیا ہے، ادارے کی جانب سے انگریزی ڈرامہ''بلیک ٹی شرٹ کلیکشن'' آج اور کل ناپا آڈیٹوریم میں پیش کیا جائے گا، برطانوی ادکار انوا ایلام نے اس کا مرکزی کردار ادا کیا ہے، تھیٹر ون مین شو ہے جو پوری کہانی کو خوبصورت انداز میں لے کر چلتا ہے۔

بلیک ٹی شرٹ کلیکشن جدید برٹش ڈرامہ ہے جسے ماڈرن تھیٹر کہا جاتا ہے جس میں تھیٹر کے تمام لوازمات کا خاص خیال رکھا گیا ہے جدید ترین لائٹنگ انتظامات، دور جدید کے تقاضوں کو مد نظر رکھ کر لگایا جانے ولا سیٹ ایڈوانس ٹیکنالوجی اس ڈرامے کی خصوصیات میں شامل ہیں، ڈرامے کا فنی اور تکنیکی عملہ برطانیہ سے آیا ہے جو پس پردہ رہ کر ڈرامہ پیش کرتا ہے معیاری کہانی، بہترین پروڈکشن، عمدہ اداکاری اور جدید ٹیکنالوجی سے آراستہ یہ کھیل پاکستانی تھیٹر شائقین کو عمدہ اور دلچسپ تفریح فراہم کرے گا، آج اور کل یہ کھیل ناپا آڈیٹوریم میں جاری رہے گا، عالمی تھیٹر میلے کو ایکسپریس میڈیا گروپ کے تعاون سے پیش کیا جارہا ہے یہ فیسٹیول27مارچ تک جاری رہے گا۔