نمائش چورنگی پر ملزمان نے ہوٹل پر بیٹھے شہریوں کو لوٹ لیا

واقعہ کی ویڈیو سوشل میڈیا پر بھی وائرل ہوگئی

Staff Reporter July 21, 2022

(فوٹو: فائل) واقعہ کی ویڈیو سوشل میڈیا پر بھی وائرل ہوگئی

ISLAMABAD: کراچی کے علاقے نمائش چورنگی پر ملزمان نے ہوٹل پر بیٹھے متعدد شہریوں کو لوٹ لیا۔

ایکسپریس نیوز کے مطابق ملزمان نمائش چورنگی پر ہوٹل پر بیٹھے متعدد افراد کو ملزمان نے انتہائی دیدہ دلیری کے ساتھ 15 منٹ تک ہوٹل پر لوٹ مار کی جس کے بعد فرار ہوگئے، مذکورہ ہوٹل پر اس سے قبل بھی واردات ہوچکی ہے۔

بدھ اور جمعرات کی درمیانی شب نمائش چورنگی پر قائم چائے کے ہوٹل پر مسلح ملزمان نے دھاوا بولا اور ہوٹل پر بیٹھے تمام افراد سے انتہائی اطمینان کے ساتھ موبائل فون، نقدی اور دیگر قیمتی اشیا لوٹ لیں جبکہ واقعہ کی ویڈیو سوشل میڈیا پر وائرل ہورہی ہے۔

متاثرہ شہریوں کے مطابق ملزمان تقریباً 15 منٹ تک لوٹ مار میں مصروف رہے لیکن اس دوران نمائش جیسے شہر کے مرکزی و مصروف علاقے میں پولیس کا کوئی وجود نہیں تھا۔

ایک شہری کا کہنا تھا کہ وہ اے ٹی ایم بوتھ سے کچھ ہی دیر پہلے رقم نکال کر آیا تھا جوکہ واردات میں لوٹ لی گئی، شہریوں کا کہنا تھا کہ اس سے قبل بھی اسی ہوٹل پر واردات ہوچکی ہے جبکہ پولیس کی جانب سے کوئی ٹھوس کارروائی نہیں کی۔